एजेन्सी – फ्रान्सेली क्लब पेरिस सेन्ट जर्मेनका युवा फरवार्ड किलीयन एमबाप्पेको चोट गम्भीर रहेको क्लबले विज्ञप्ति जारि गर्दै जानकारी दिएको छ ।

शुक्रबार भएको कप डे फ्रान्सको फाइनलका दौरान एमबाप्पेले चोट बोकेका थिए । सेन्ट एटिएनका कप्तान लोइस पेरिनले गरेको फलका कारण चोट बोकेका एमबाप्पेले अब च्याम्पियन्स लिग गुमाउने सम्भावना बढेको छ । पेरिनको फलमा रेफ्रीले सुरुवातमा पहेंलो कार्ड दिएपनि भिडियो असिस्टेन्ट रेफ्रीको सहायताले रातो कार्ड दिएका थिए ।

एमबाप्पेले चोट बोकेपछि खेल्न नसक्दा परिवर्तन हुनुपरेको थियो । फाइनलमा नेयमारको गोलमा अग्रता लिइसकेको पीएसजीले त्यसै गोलको मदतले उपाधि जितेको थियो । एमबाप्पे दोस्रो हाफमा बैसाखीको सहारा लिएर बेन्चमा देखिएका थिए । क्लबले उनको परिक्षण गरेर प्रारम्भिक रिपोर्टमा गम्भीर चोट देखिएको बताएको छ ।

क्लबले जारि गरेको विज्ञप्ति अनुसार एमबाप्पेको दायाँ खुट्टाको एंकलको एक्स्टर्नल लेटरल कम्पार्टमेन्टमा गम्भीर चोट लागेको छ । क्लबले अब केहि दिनमा नै विस्तृत परिक्षण गर्नेछ । एमबाप्पेले ७२ घण्टापछि चोटको पुन: परिक्षण गराएपछि अझ जानकारी प्राप्त हुने क्लबले जनाएको छ ।

एमबाप्पेले यस सिजन ३३ खेल २९ गोल गरेका छन् । फ्रान्सको शीर्ष डिभिजन लिगसहित सम्पूर्ण प्रतियोगिता कोरोना भाइरसका कारण रद्द भएपनि पीएसजी च्याम्पियन बनेको थियो । क्लबले कप डे फ्रान्सको उपाधि जितेपछि अब अझै दुई उपाधिका लागि खेल्न बाँकी रहेको छ ।

पीएसजीले ३१ जुलाईमा लियोनसँग फ्रान्सेली लिग कपका लागि प्रतिस्पर्धा गर्दैछ । त्यसपछि १२ अगस्टमा पोर्चुगलको लिस्बनमा पीएसजीले च्याम्पियन्स लिगको क्वाटरफाइनलमा एटलान्टाको सामना गर्नेछ । एटलान्टालाई पराजित गरे त्यसको एक सातापछि (१८-१९ अगस्ट)मा क्लबले सेमिफाइनल खेल्नेछ । फाइनल खेल २३ अगस्टमा हुनेछ ।