एजेन्सी – इंग्लिस क्लब म्यान्चेस्टर सिटीले भ्यालेन्सियाका युवा विंगर फेरान टोरेसलाई अनुबन्धन गर्ने प्रयास थालेको छ । जर्मन विंगर लेरोय साने बायर्न म्युनिख गएपछि सिटीले उनको स्थानमा २० वर्षीय टोरेसलाई ल्याउन खोजेको हो ।

भ्यालेन्सियाले टोरेसका लागि ४० मिलियन युरो माग गरेको छ । भ्यालेन्सियासँग सम्झौताको अन्तिम वर्षमा रहेका टोरेस पनि सिटी जान इच्छुक रहेका छन् । भ्यालेन्सियाले अर्को सिजन युरोपेली प्रतियोगिता नखेल्ने भएपछि क्लबको आर्थिक भार कम गर्न पनि टोरेस बेच्न चाहेको हो ।

सिटीका प्रशिक्षक पेप गुआर्डीओलाले टोरेससँग छलफल गरेर उनलाई क्लबमा अनुबन्ध हुने सुझाव दिएका छन् । टोरेस पनि आफ्नो करिअरलाई अर्को स्तरमा उकास्न सिटी जान तयार रहेको क्लब स्रोतले जानेको छ । यसअघि डर्टमुन्डले पनि टोरेसलाई अनुबन्ध गर्न छलफल अगाडी बढाएको थियो । तर सिटीले च्याम्पियन्स लिग खेल्न पाउने भएसँगै टोरेस इंग्ल्यान्ड आउन चाहेका छन् ।

टोरेसले ७ वर्षको उमेरदेखि नै भ्यालेन्सियाको एकेडेमीमा प्रशिक्षण गरेका थिए । उनले १७ वर्षको उमेरमा नै सिनियर टोलीबाट डेब्यु गरेका थिए । त्यसयता उनले भ्यालेन्सियाका लागि १ सय भन्दा बढी खेल खेलिसकेका छन् । उनले भ्यालेन्सियाबाट २०१८-१९ सिजनमा कोपा डेल रे जितेका थिए । स्पेनी यू-१७ र यू-१९ टोलीबाट युरो जितेका उनलाई चाडै सिनियर टोलीको जर्सीमा देख्ने विश्लेषकको भनाइ छ ।

सिटीले टोरेससँगै सेन्टर डिफेन्डर अनुबन्ध गर्ने योजना बनाएको छ । गत सिजनको विजेता सिटी यसपटक दोस्रो स्थानमा रहँदै लिग अन्त्य गरेको थियो । क्लबले रेलिगेसनमा परेको बर्नमाउथका डिफेन्डर नाथन आकेलाई अनुबन्ध गर्ने तयारी गरिरहेको छ ।

गुआर्डीओलाले यसअघि नेपोलीका डिफेन्डर कालिडु कौलीबालिमाथि नजर राखेपनि नेपोलीले ठूलो रकम माग गरेपछि सिटी पछि हटेको थियो । गत सिजन अर्जेन्टिनी डिफेन्डर निकोलस ओटामेन्डी र इंग्लिस डिफेन्डर जोन स्टोन्सले अपेक्षित प्रदर्शन गर्न नसक्दा १९ वर्षीय स्पेनिस डिफेन्डर एरिक गार्सियाले पहिलो रोजाईका रुपमा फ्रान्सेली एमेरिक लापोर्टसँग रक्षापंक्ति सम्हालेका थिए ।