एजेन्सी –कप्तान सर्जियो रामोसले रियल म्याड्रिड छाडेर प्रिमियर लिग टोली एभर्टनमा आबद्ध भएका हामेस रोड्रिग्वेजका लागि भावुक सन्देश पोष्ट गरेका छन् । सोमबार साँझ रोड्रिग्वेजलाई एभर्टनले सर्वाजनिक गरेको थियो ।

६ वर्ष लामो यात्राको अन्त्य गर्दै कोलम्बियन हामेसले इग्लिस क्लब रोजेका थिए । हामेस रियलका समर्थकमाझ लोकप्रिय खेलाडी मध्ये थिए । उनीबीचमा दुई सिजन बार्यन म्युनिखमा लोनमा बिताएका थिए । पछिल्लो सिजन भने रियल म्याड्रिडमा पर्याप्त अवसर नपाएपछि हामेसले क्लब छाड्न चाहेको बताएका थिए ।

रामोसले सामाजिक संजालमार्फत व्यक्तिगत रुपमा राम्रो सम्बन्ध बनाएका हामेसलाई संदेश दिएका छन् । ‘शुभकामना साथी’, रामोसले इन्स्टग्राममा रोड्रिग्वेजसँगको फोटो पोष्ट गर्दै लेखेका छन्, ‘हुन त तिम्रो बायाँ खुट्टा र क्षमताका लागि त्यो भनिराख्नु पर्दैछ । छिट्टै भेटौंला । शुभेच्छा छ ।’

एभर्टनले २९ वर्षे मिडफिल्डर रोड्रिग्वेजलाई २ वर्षको लागि २० मिलियन युरोमा अनुबन्धित गरेको हो । रियलमा खेल्ने अवसर कमै मात्र पाएपछि रोड्रिग्वेज नयाँ क्लबको खोजीमा थिए । उनलाई अमेरिकी लिगको इन्टर मायमीले अनुबन्ध गर्ने प्रस्ताव गरेपनि प्रशिक्षक कार्लो एन्चेलोटिसँग सम्पर्कमा आएपछि उनले प्रिमियर लिग रोजेका थिए ।

एभर्टनमा अनुबन्धित भएसँगै रोड्रिग्वेजले आफ्नो करियरमा नयाँ चुनौती थपिए उल्लेख गर्दै भनेका थिए, ‘राम्रो सुरुवात गर्न चहान्छु । खुसी र उत्सुक छु । महत्वाकांक्षा लिएर आएको यस क्लबमा समर्पण र प्रतिबद्धता पुरा गर्नेछु ।’

सन् २०१४ को ब्राजिल विश्वकपमा उच्च प्रदर्शन गरेपछि रियलले रोड्रिग्वेजलाई फ्रान्सेली क्लब मोनाकोबाट ६३ मिलियन पाउन्डमा अनुबन्धित गरेका थिए । हामेस त्यसपछि २०१७ मा बायर्न म्युनिखमा लोनमा अनुबन्धित भएका थिए । दुवै क्लबमा त्यसबेला एन्चेलोटि प्रशिक्षक थिए ।