एजेन्सी – स्पेनिस च्याम्पियन रियल म्याड्रिड र रायो भालेकानोबीच तय मैत्रीपूर्ण खेल कोरोना भाइरसका रद्द भएको छ । नयाँ सिजनको तयारीका लागि बुधबारका लागि मैत्रीपूर्ण खेल तय थियो ।

रायोका एक खेलाडीको पिसिआर परिक्षणको नतिजा आइनसकेका कारण खेल रद्द गरिएको बताएको छ । स्वास्थको मामलामा जोखिन उठाउनु भन्दा खेल रद्द गर्नका लागि दुवै क्लब सहमत भएको बताइएको छ । पिसिआरको नजिता बुधबार बिहानसम्म पनि थाहा नभएको र बाँकी केहि घन्टा जानकारी नहुने भएपछि खेल रद्द गरिएको हो ।

मैत्रीपूर्ण खेल बन्द रंगशालामा सञ्चारमाध्यम विना खेलाउने योजना थियो । खेल हुने समय नजिकिंदा पनि खेल हुने नहुने अन्यौल रहेकाले दुवै क्लबले खेल रद्द गर्ने सहमति गरेका हुन् । प्रशिक्षक जिदानले अन्तर्राष्ट्रिय खेलमा आबद्ध खेलाडीबिना नै अन्य खेलाडीलाई मौका दिने सोचेका थिए ।

जिदानले अर्को सिजनको तयारीस्वरूप युथ टोलीका केहि खेलाडीलाई पनि मैत्रीपूर्ण खेलमा सहभागी गर्ने योजना बनाएका थिए । उनले सिनियर र युवा खेलाडीको मिश्रण गरेर दुवै हाफमा फरक टोली उतार्ने लक्ष्य राखेका थिए ।

ला लिगा च्याम्पियन रियलले आफ्नो पहिलो खेल सेप्टेम्बर २० मा खेल्ने छ । रायोले भने स्पेनिस लिगको दोस्रो श्रेणीमा आफ्नो पहिलो खेल आइतबार रियल मार्लोकासँग प्रतिस्पर्धा गर्नेछ । मालोर्का अघिल्लो सिजन रेलिगेसनमा परेको थियो ।