एजेन्सी– बार्सिलोनाका सुपर स्टार लिओनेल मेस्सी प्रि सिजनमा टोलीका अन्य खेलाडीसँग पहिलो पटक अभ्यासमा जुटेका छन् । क्लब छाड्ने चर्चाबीच अघिल्लो साता सुरु भएको अभ्यासमा मेस्सी समावेश भएका थिएनन् ।

मेस्सीले सम्झौताको बाँकी अवधी बार्सिलोनामा बस्ने निर्णय गरेसँगै उनी सोमबारबाट प्रशिक्षणमा फर्केका थिए । तर, कोरोना भाइरसको प्रोटेकोललाई मान्ने क्रममा मेस्सीले दुई दिन एक्लै प्रशिक्षण गरेका थिए ।

कोरोनाको दोस्रो परिक्षणमा पनि नेगेटिभ आएपछि बुधबार मेस्सीले टोलीका अन्य खेलाडीका साथ अभ्यास गरेका हुन् । नयाँ प्रशिक्षक रोनाल्ड कोम्यानको प्रशिक्षणमा मेस्सी पहिलो पटक सामेल भएका हुन् । टोलीको अभ्यास भने अघिल्लो सोमबार सुरु भएको थियो ।

ढिला गरि अभ्यासमा सामेल भएका मेस्सीले शनिबार हुने जिम्याष्टिक डी टारोगोनासँग मैत्रीपूर्ण खेलमा खेल्ने नखेल्ने शंकामा छ । शारीरिक रुपमा फिट नएकै अवस्थामा पक्कै पनि उनलाई लिएर कोम्यानले जोखिम उठाउने छैनन् ।

फिलिपे काउटिन्हो, सर्जियो बुस्केट, फ्रन्किन डि जोङ र आसु फाती पनि बुधबार अभ्यासमा सामेल भएका छन् । टोलीका अर्का फरवार्ड फ्रान्सेली फरवार्ड एन्टोइन ग्रिजमन भने अझै टोलीमा सामेल हुन बाँकी छ । नेसन्स कपमा मंगलबार फ्रान्सको खेल थियो ।

च्याम्पियन्स लिग क्वार्टरफाइनलमा बायर्न म्युनिखसँग ८–२ ले पराजित भएको केहि दिन पछि नै मेस्सीले बार्सिलोना छाड्ने पत्र क्लबलाई लेखेका थिए । तर, क्लबले भने ७ मिलियन युरोको रिलिज क्लब तिरे मात्र छाड्ने अडान थियो । जसका कारण अन्य क्लबले त्यो रकम तिर्न नसक्ने भन्दै मेस्सी कम्तीमा यो सिजन बार्सिलोनामै रहने निर्णयमा पुगेका हुन् ।