एजेन्सी – फ्रान्सेली क्लब पेरिस सेन्ट जर्मेन (पीएसजी) का गोलरक्षक अलफोन्स एरिओला इंग्लिस प्रिमियर लिग क्लब फुलहममा अनुबन्धित भएका छन् ।

फुलहमले २७ वर्षीय एरिओलालाई एक वर्षका लागि लोनमा अनुबन्ध गरेको हो । सम्झौतामा अर्काे वर्ष स्थायी रुपमा राख्न सक्ने प्रावधान पनि रहेको छ । सम्झौतापछि एरिओलाले स्कट पार्करको टोलीमा समावेश हुन पाँउदा खुसी लागेको बताएका छन् । प्रशिक्षक स्कट पार्करको अनुरोधमा आफु आएको र पार्करले आफुलाई नै चाहेको उनले थपे ।

‘फुलहम लन्डनको एक ऐतिहासिक क्लब हो । मैले स्टेडियमको बारेमा धेरै कुरा सुनेको छु । मलाई आशा छ यो सिजन हाम्रो लागि राम्रो हुनेछ । म आफ्नो पुरानो फर्म फर्काउने प्रयास गर्नेछु । यो टोलीलाई उच्च स्थानमा राख्न आफ्नो सम्पुर्ण शक्ति खर्चनेछु,’ अनुबन्ध भएपछि गोलरक्षक एरिओलाले भने ।

क्लब फुटबल निर्देशक टोनी खानले अलफेन्सो एक अनुभवी र उच्च स्तरको गोलरक्षक रहेको र फुलहममा उनको अनुभवले पनि काम गर्ने बताएका छन् । सन् २०१८ देखि फ्रान्सेली टोलीमा रहेका एरिओलाले पीएसजीबाट १०७ क्याप जितेका छन् । २०१२ देखि पीएसजीको सिनियर टोलीमा रहेका एरिओलाले लेन्स, बास्टिया, भिल्लारियल र रियल म्याड्रिडबाट लोनमा खेलिसकेका छन् ।

रियलले गत सिजन स्पेनिस ला लिगाको उपाधि जित्दा एरिओला टोलीका सदस्य रहेका थिए । रियलमा पहिलो रोजाईका थिवाउट कोर्टुवा रहँदा उनले मात्रै ९ खेलमा अवसर पाएका थिए ।