एजेन्सी – लन्डन क्लब चेल्सीका बेल्जियन फरवार्ड मिचे बात्सुयाई पुनः प्रिमियर लिग क्लब क्रिस्टल प्यालेसमा अनुबन्धित भएका छन् ।

२६ वर्षीय बात्सुयाईले अघिल्लो सिजन पनि क्रिस्टल प्यालेसबाटै लोनमा खेलेका थिए । क्रिस्टलले बात्सुयाईलाई गत जनवरीमा लोनमा अनुबन्धित गरेको थियो । बात्सुयाईलाई अनुबन्ध गर्न वेस्ट ब्रुम, न्युक्यासल, लिड्स युनाइटेड र जर्मन क्लबले चासो देखाएपनि प्यालेसले उनलाई पुनः अनुबन्ध गर्न सफल भएको हो ।

चेल्सीसँगको सम्झौता एक वर्ष नवीकरण गरेसँगै बात्सुयाई पुनः क्रिस्टल प्यालेसमा लोनमा फर्किएका हुन् । सन् २०१६ मा ३३ मिलियन पाउन्डमा चेल्सी आएका बात्सुयाईको सम्झौता अर्काे वर्षसम्म रहेको थियो । चेल्सीले नयाँ सम्झौता नवीकरण गरेसँगै बात्सुयाई अर्काे वर्षपनि फ्रि एजेन्ट नहुने भएका छन् ।

बात्सुयाई चेल्सीमा आएपनि पहिलो रोजाईमा पर्न निकै संघर्ष गरिरहनु परेको छ । उनले पछिल्ला वर्ष जर्मन क्लब बोरुसिया डर्टमुन्ड, स्पेनिस क्लब भ्यालेन्सिया हुँदै क्रिस्टल प्यालेसबाट पनि लोनमा खेलिसकेका छन् ।

५३ मिलियन पाउन्डमा टिमो वेर्नरलाई खरिद गरेको चेल्सीमा ट्याम्मी अब्राहम र ओलिभर जिरुउड पनि छन् । फ्रान्क लाम्पर्डको टोलीमा चौथो फरवार्डको रुपमा रहने भएकाले बात्सुयाई लोनमा गएका हुन् । गत जनवरीमा लोनमा प्यालेस पुगेका बात्सुयाईले १३ खेलमा ६ गोल गरेका थिए ।