एजेन्सी – रियल म्याड्रिडका फरवार्ड ग्यारेथ बेल र डिफेन्डर सर्जियो रेगुइलोन लन्डन क्लब टोटेनहम हट्सपरमा अनुबन्धित भएका छन् ।

३१ वर्षीय फरवार्ड बेल पूर्व क्लबमा एक वर्ष लोनका लागि आबद्ध हुन लागेका हुन् । उनलाई क्लबले अर्को एक वर्ष पनि लोनमा राख्ने विकल्प रहेको छ । बेलको वार्षिक ३० मिलियन युरो तलबमा रियल म्याड्रिड र टोटेनहम दुवैले बाडफाड गरेका छन् ।

रेगुइलोनले भने ५ वर्षको लागि क्लबसंग सम्झौता गरेका हुन् । २३ वर्षीय डिफेन्डरलाई अनुबन्ध गर्न टोटेनहमले ३० मिलियन युरो खर्च गरेको बुझिएको छ । गत सिजन सेभिल्लामा खेलेका उनलाई म्यानचेस्टर युनाइटेडले पनि अनुबन्ध गर्न खोजेको थियो । तर दुई क्लबबीच सहमति हुन सकेन ।

टोटेनहमका प्रशिक्षक जोसे माउरिन्हो बेलप्रति सकारात्मक भएकै कारण क्लबका अध्यक्ष ड्यानीएल लेभीले उनीसँगको सम्झौताका लागि प्रयास गरेका थिए । बेलले चोटका कारण पूर्व क्लबमा पुनरागमन खेलका लागि भने प्रतीक्षा गर्नुपर्ने छ । सन् २०१३ मा टोटेनह्यामले रियललाई बेल विक्री गरेको थियो ।

पछिल्लो वर्ष रियलले ला लिगा उपाधि जितेपनि प्रशिक्षक जिनेदिन जिदानसँग बेलको सम्बन्ध खासै राम्रो हुन सकेन । त्यहि कारण पनि उनी क्लब छाड्न चाहिरहेका थिए । जिदान ३१ वर्षे फरवार्डले क्लब छाडे हुने आशय व्यक्ति गरिरहेका हुन्थे । रियलमा रहंदा बेलले ४ पटक च्याम्पियन्स लिग उपाधि जितेका थिए ।