एजेन्सी – इंग्लिस प्रिमियर लिग अन्तर्गत म्यानचेस्टर युनाइटेडले सिजनको पहिलो खेलमा क्रिस्टल प्यालेससँग ३-१ को हार बेहोरेको छ ।

घरेलु मैदान ओल्ड ट्राफर्डमा डिफेन्सले कमजोर प्रदर्शन गरेपछि युनाइटेड पराजित हुन पुगेको हो । गत सिजन युरोपा लिगको अन्तिम चारसम्म यात्रा तय गरेको युनाइटेडले गत साता विश्राम पाएको थियो । युनाइटेडले नयाँ सिजनको पहिलो खेलमा खराब सुरुवात गरेको थियो ।

खेलको सातौं मिनेटमा नै आन्ड्रोस टाउनसेन्डले जेफ्री स्लपको पासमा गोल गर्दै पाहुना टोलीलाई अगाडी बढाए । युनाइटेडले बल पोसेसनमा पकड जमाएपनि सटिक आक्रमण बुन्न सकेन । दोस्रो हाफमा प्रशिक्षक ओले गनर सोल्सायरले मेसन ग्रिनवुडलाई मैदान उतारेका थिए । तर त्यसका बाबजुद पनि टोलीको आक्रमण फेरिएन ।

प्यालेसले ७४ औं मिनेटमा पेनाल्टीमा अग्रता दोब्बर पार्यो । भिक्टर लिन्डेलफको हातमा बलले लागेपछि भीएआरबाट प्राप्त पेनाल्टीमा जोर्डन आयु चुकेका थिए । तर आयुको प्रहार रोक्ने क्रममा गोलरक्षक डेविड डे हेया पेनाल्टी हान्नुअघि नै लाइनबाट अगाडी आएपछि रेफ्रीले पुन: पेनाल्टी दिएका थिए । त्यसमा विल्फ्रिड जाहाले गोल गर्दै अग्रता दोब्बर पारे ।

युनाइटेडका लागि डेब्यु गरिरहेका डोनी भान डे बिकले ८० औं मिनेटमा गोल फर्काउँदै खेलमा फर्काउने संकेत दिए । युनाइटेडले केहि समय राम्रो प्रदर्शन पनि गर्यो । तर काउन्टर अट्याकमा विल्फ्रिड जाहाले दुई डिफेन्डरको चुनौती परास्त गर्दै गोल गरेपछि प्यालेसको जित पक्का भयो ।

प्यालेसको यो लगातार दोस्रो जित हो । टोली २ खेलमा ६ अंकसहित गोलअन्तरमा एभर्टनभन्दा पछाडी दोस्रो स्थानमा छ । दिनको पहिलो खेलमा एभर्टनले घरेलु मैदानमा वेस्ट ब्रोमविच आल्बियनमाथि ५-२ को फराकिलो जित दर्ता गरेको थियो । एभर्टनको जितमा फरवार्ड डोमिनिक काल्भर्ट लेविनले ह्याट्रिक तथा हामेस रोड्रीग्वेज र माइकल किनले १-१ गोल गरे ।

खेलको दशौं मिनेटमा नै पाहुना टोली वेस्ट ब्रोमले अग्रता लिँदै एभर्टनलाई स्तब्ध बनाएको थियो । यसै सिजन वेस्ट ह्यामबाट आएका युवा फरवार्ड ग्रेडी डियान्गनाले पेनाल्टी क्षेत्र बाहिरबाट गरेको प्रहारलाई गोलरक्षक जोर्डन पिकफर्डले बचाउने सकेनन् । ३२ औं मिनेटमा एभर्टनले खेल बराबरीमा ल्यायो । वेस्ट ब्रोमका डिफेन्डरले हेडरमा बल क्लियर गर्न नसक्दा आएको रिबाउन्डलाई डोमिनिक काल्भर्ट लेविनले ब्याकहिलमा गोल गरे ।

पहिलो हाफको इन्ज्युरी समयको पहिलो मिनेटमा हामेस रोड्रीग्वेजले गोल गर्दै खेलमा एभर्टनलाई अग्रता दिलाए । रिचार्लीसनको पासलाई हामेसले पेनाल्टी क्षेत्र बाहिरबाट नै गोल गर्न सफल रहे । रियल म्याड्रिडबाट एभर्टन आएको दोस्रो खेलमा नै हामेस गोलको खाता खोल्न सफल रहे ।

अग्रता लिएको एक मिनेटपछि नै वेस्ट ब्रोमका काइरान गिब्स हामेसलाई हातले हानेपछि रातो कार्ड खाँदै बाहिरीए । हाफ सकिएपछि रेफ्रीसँग गरेको व्यवहारका कारण वेस्ट ब्रोमका प्रशिक्षक स्लाभेन बिलीचले पनि रातो कार्ड खाए ।

दश खेलाडीमा सिमित हुनुका बाबजुद वेस्ट ब्रोमले दोस्रो हाफको सुरुवातमै बराबरी गोल फर्कायो । म्याथिअस परेराले ४७ औं मिनेटमा झन्डै ३० यार्ड टाढाबाट फ्रिकिकमा सिधै गोल गर्दै पाहुना टोलीलाई खेलमा फर्काए । तर ७ मिनेटपछि नै एभर्टनका माइकल किनले गोल गरे । रिचार्लिसनको हेडर गोलरक्षक साम जोन्सटनले विफल पारेपनि रिबाउन्डमा किन सफल भए ।

काल्भर्ट लेविनले ४ मिनेटको अन्तरमा दुई गोलका साथ ह्याट्रिक पूरा गर्दै फराकिलो जिततर्फ उन्मुख गराए । ६६ औं मिनेटमा रिचार्लिसनको पासलाई गोलमा परिणत गर्दै लेविनले ४-२ को अवस्थामा पुर्याए । हामेस रोड्रीग्वेजको कर्नरमा हेडर गोल गर्दै लेविनले एभर्टनका लागि पहिलो ह्याट्रिक पूरा गरे ।

अर्को खेलमा लिड्स युनाइटेडले प्रिमियर लिग सिजनमा पहिलो जित दर्ता गर्ने क्रममा बढुवा भएको अर्को क्लब फुलहमलाई ४-३ ले हरायो । पहिलो खेलमा लिभरपुलसँग सोहि स्कोरमा हारेको लिड्सले पाँचौ मिनेटमा हेल्डर कोस्टाको गोलमा अग्रता लिएको थियो । ३४ औं मिनेटमा एलेक्जेन्डर मित्रोभिचले पेनाल्टीमा स्कोर बराबर गरेपनि म्याथुज क्लिकले ४१ औं मिनेटमा पेनाल्टीबाट नै अग्रता पुन: स्थापना गरे ।

दोस्रो हाफको ७ मिनेटको अन्तरमा २ गोल गरेपछि लिड्सले ४-१ को अग्रता लियो । प्याट्रिक बामफर्डले ५० औं मिनेटमा क्लिकको पासमा गोल गरे । त्यसको ७ मिनेटमा बामफर्डको क्रसमा कोस्टाले व्यक्तिगत दोस्रो गोल गरे । बबी रिड र मित्रोभिचले १-१ गोल फर्काएअनि लिड्स अग्रता जोगाउँदै जित दर्ता गर्न सफल रहयो ।