एजेन्सी – नर्वेजियन युवा स्टार एर्लिङ ब्राउट हालान्डको दुई गोल सहयोगमा बोरुसिया डर्टमुन्डले जर्मन बुन्डेसलिगामा सुखद सुरुवात गरेको छ ।

बुन्डेसलिगाको नयाँ सिजनको पहिलो खेलमा डर्टमुन्डले बोरुसिया मोन्चेनग्लाडवाकमाथि ३–० को सहज जित निकाल्दै विजयी शुरुवात गरेको हो । सिग्नल इडुना पार्कमा शनिबार राति भएको खेलमा घरेलु टोलीको सहज जितमा हालान्डले दुई गोल गर्दा जियोभानी रेनाले एक गोल थपे ।

प्रतिस्पर्धात्मक बनेको खेलको २०औं मिनेटमा घरेलु टोलीका एर्लिङ ब्राउट हालान्डको प्रहारलाई मोन्चेनग्लाडवाकका गोलरक्षक यान सोमेरले बचाए । लगत्तै हालान्डकै प्रहारमा डिफेन्डर बाधक बन्दा डर्टमुन्ड अग्रता लिनबाट चुक्यो ।

३१औं मिनेटमा जोनास होफमनको प्रहारलाई डर्टमुन्डका गोलरक्षक रोमन बुर्कीले बचाउदै खतरा टारे । ३४औं मिनेटमा जियोभानी रेनाले गोल गर्दै घरेलु टोलीलाई १–० को अग्रता दिलाए । उनले जुडे बेलिङघमको पासमा गोल गर्न सफल भएका थिए । ४१औं मिनेटमा स्टेफन लेइनेरको प्रहारलाई रोमन बुर्कीले बचाउदै डर्टमुन्डलाई पहिलो हाफमा १–० को अग्रता कायम राखे ।

दोस्रो हाफमा बोरुसिया मोन्चेनग्लाडवाकले बल पोजेसनमा नियन्त्रणमा लिएपनि डर्टमुन्डका हालान्ड दृश्यमा आउदै दुई गोल गर्न सफल भए । दोस्रो हाफका शुरुमै डर्टमुन्डले पेनाल्टी गोलमार्फत अग्रता दोब्बर बनायो ।

जियोभानी रेनालाई पेनाल्टी बक्समा रेमी बेन्सेबैनीले फल गरेपछि रेफ्रीले डर्टमुन्डलाई पेनाल्टी दिएका थिए । जसमा हालान्ड चुकेनन् । ७०औं मिनेटमा प्याट्रिक हर्मनले गोल अन्तर घटाउने अवसर पाएपनि डर्टमुन्डका गोलरक्षक रोमन बुर्की बाधक बने ।

७६औं मिनेटमा इंग्लिस युवा मिडफिल्डर जाडोन सान्चोको उत्कृष्ट पासमा हालान्डले उत्कृष्ट फिनिस गर्दै डर्टमुन्डलाई ३–० को अग्रता दिलाए । ८३औं मिनेटमा मोन्चेनग्लाडवाकका जोनास होफमनको प्रहारले पोस्टको दिशा दिशा लिन सकेन ।

८५औं मिनेटमा फ्लोरियन निउहसको प्रहार पनि पोस्टबाट थोरै बाहिरियो । त्यसपछि थप गोल निस्कन नसक्दा डर्टमुन्ड ३–० ले विजयी हुदै ३ अंक जोड्न सफल भयो ।

अन्य नतिजा

एफसी कोल्नविरुछ होफेनहाइन (२–३)

फ्रान्कफर्टविरुद्ध अर्मिनिया बिलेफिल्ड (१–१)

युनियन बर्लिनविरुद्ध अग्सवर्ग (१–३)

भिएफबी स्टुटगार्टविरुद्ध फ्रेइवर्ग (२–३)

वेर्डर ब्रेमेनविरुद्ध हर्था बिएससी (१–४)