एजेन्सी – लन्डन क्लब आर्सनलले इंग्लिस प्रिमियर लिगमा लगातार दोस्रो सफलता हात पारेको छ । नयाँ सिजनमा लगातार दोस्रो सफलता आत पार्ने क्रममा आर्सनलले वेस्टह्याम युनाइटेडमाथि २–१ को प्रतिस्पर्धात्मक जित निकालेको हो ।

यसअघि आर्सनलले पहिलो खेलमा फुलहममाथि ३–० को सहज जित निकालेको थियो । इमिरेट्स स्टेडियममा आर्सनको जितमा एलेसान्द्रे लाकाजेट र इडवार्ड एनकेटियाले गोल गरे । पाहुना टोलीका माइकल एन्टोनियोले गरेको गोल सान्त्वना बन्यो ।

खेलको सुरुवातमा वेस्टह्यामले घरेलु टोलीमाथि दवाव बढाएको थियो । खेलको पाँचौ मिनेटमा नै आर्सनलका गोलरक्षक बर्न लेनो बाधक बन्दा वेस्टह्याम अग्रता लिनबाट चुकेको थियो । कप्तान डिक्लन राइसको पासमा एन्जेलो ओग्वोमाको हेडरलाई आर्सनलका गोलरक्षक लेनोले बचाएका थिए । सातौ मिनेटमा डिक्लन राइसकै पासमा आरोन क्रेसवेलको प्रहारलाई ड्यानियल सेवालोसले ब्लक गर्दै आर्सनलको संकट टारे ।

१५औं मिनेटमा आर्सनलका ग्याब्रिलले जारोड बोवेनलाई फल गरेको भन्दै वेस्टह्यामले पेनाल्टी अपिल गरेपनि रेफ्रीले त्यसलाई मतलब नै गरेनन् । खेलको सुरुवातमा दवाव झेलेको आर्सनले २५औं मिनेटमा गोल गर्दै अग्रता लिन सफल भयो । कप्तान पिएर इमरिक औवामियाङको क्रस पासमा अनमार्क रहेका लाकाजेटले फ्रि हेडरमार्फत गोल गरेका थिए ।

३०औं मिनेटमा आर्सनलका साकाको प्रहार आकासियो । ४५औं मिनेटमा माइकल एन्टोनियोले गोल गर्दै खेललाई पहिलो हाफमा १–१ गोलको बराबरीमा ल्याए । रायन फ्रेडेरिक्सको पासमा गोल गर्न सफल भएका थिए । ६७औं मिनेटमा एन्टोनियोको पावरफुल हेडर क्रसबारमा लागेर बाहिरिदा वेस्टह्यामले खेलमा अग्रता लिने अवसर गुमायो ।

लगत्तै वेस्टह्यामको अर्काे प्रहारमा आर्सनलका गोलरक्षक लेनो बाधक बन्दा वेस्टह्याम पुनः अग्रता लिबाट चुक्यो । ८५औं मिनेटमा ड्यानियल सेवालोसको पासमा इडवार्ड एनकेटियाले खाली पोस्टमा गोल गर्दै आर्सनलाई २–१ को प्रतिस्पर्धात्मक जित दिलाए । इन्ज्युरी समयमा आर्सनलले दुई अवसर पाएपनि सदुपयोग गर्न सकेन ।

लगतार दुई जित हात पारेको आर्सनल ६ अंक जोडेर दोस्रो स्थानमा रहेको छ । वेस्टह्यामले अंकको खाता खोल्न सकेको छैन । एभर्टन ६ अंक जोडेर शीर्षस्थानमा छ ।

अन्य नतिजा

एभर्टनविरुद्ध वेस्ट ब्रुम (५–२)

लिड्सविरुद्ध फुलहम (४–३)

म्यानचेस्टर युनाइटेडविरुद्ध क्रिस्टल प्यालेस (१–३)