एजेन्सी – बार्सिलोनाको प्रि सिजन तयारीमा फिलिपे काउटिन्होले उच्च प्रदर्शन गर्दै आएका छन् । जसका कारण उनी नयाँ सिजन उत्साहजनक हुनेमा आशावदी छन् ।

क्याटलान क्लब बार्सिलोनाले शनिबार एल्चेलाई १–० ले हराउँदै जोआन गाम्पर ट्रफी जितेको छ । मैत्रीपूर्ण खेलका रुपमा रहेपनि आठौं पटक उक्त ट्रफी जित्दै बार्सिलोनाले नयाँ सिजनका लागि पूर्ण रुपमा तयारी रहेको संकेत गरेको छ । गत सिजन लोनमा बुन्डेस लिगा च्याम्पियन बायर्न म्युखिनबाट खेलेका काउटिन्हो शनिबार पहिलो रोजाईमा थिए । उनी खेलको म्यान अफ द म्याच भएका थिए ।

‘म राम्रो समयको लागि आशावादी छु । म उच्च मनोबलका साथ खेलिरहेको छु’, एल्चेसँगको खेलपछि काउटिन्होले भने, ‘म यो सिजन अझै मेहनत गर्न चाहन्छु र जति सक्दो राम्रो मैदानमा देखाउन प्रयास गर्नुछु ।’

नयाँ प्रशिक्षक रोनाल्ड कोम्यानको नेतृत्वमा लगतार सुधार गरिरहेको पनि काउटिन्होले बताए । ‘हामीले प्रि सिजनमा धेरै अभ्यास गर्न पाएका छैनौं । जति समय पाएका छौं त्यसमा सुधार गरिरहेका छौं’, उनले थपे,‘ प्रशिक्षण टोलीको तरिकामा हामी अभ्यस्त हुँदै गइरहेका छौं । सिजन सुरुवातका लागि अझै हामीसँग एक साताको समय बाँकी छ । ’

सेप्टेम्बर २७ मा खेल्दै बार्सिलोनाले यो सिजनको ला लिगा सुरु गर्नेछ । कोभिड १९ का कारण प्रभावित ला लिगामा यसअघि निर्धारित बार्सिलोनको २ खेल भने स्थगित भएका थिए । गत सिजन भने बार्सिलोनाका लागि बिर्सनलायक रह्यो । टोलीले लामो समयपछि गत वर्ष उपाधिविहिन हुनुपरेको थियो ।