एजेन्सी – इंग्लिस प्रिमियर लिगमा आज (आइतबार) विभिन्न चार खेलमा प्रतिस्पर्धा हुँदैछ । खेलाडी अनुबन्धमा मोटो रकम खर्चिएको चेल्सीले साविक विजेता लिभरपुललाई घरेलु मैदानमा आतिथ्यता गर्दैछ ।

चेल्सी र लिभरपुलबीचको खेल स्टामफोर्ड ब्रिजमा नेपाली समय अनुसार राति ९ः१५ बजे सुरु हुनेछ । पहिलो राउन्डको खेलमा सफलता हात पारेको दुवै टोली लगातार दोस्रो जितको खोजीमा मैदान उत्रनेछन् । साविक विजेता लिभरपुलले पहिलो खेलमा लिड्स युनाइटेडलाई ४–३ ले तथा चेल्सीले ब्राइटनलाई ३–१ ले पराजित गरेको थियो ।

चेल्सीलाई खेलाडीको चोट र फिटनेसको चिन्ता हुनेछ । यसै सिजन अनुबन्ध भएका डिफेन्डर थियागो सिल्भा र वेन चिलवेल फिटनेससँग जुधिरहँदा हाकिम जियाच र क्रिस्टियन पुलिसिचले चोटका कारण लिभरपुलको खेलमा उपलब्ध हुने छैन । तर, काई हाभर्ट्ज र टिमो वेर्नर लिभरपुलविरुद्धको खेलमा उपलब्ध हुने छन् ।

यसबाहेक चेल्सीसँग मासन माउन्ट, रोस बार्कली, माटियो कोभासिस, एङ्गोलो कान्टे, रिस जेम्स, एन्ड्रिएस क्रिस्टेन्सेन, कोर्ट जोउमा, किपा एरिजाबालगा र कप्तान सेजार एज्पीलिक्वेटा हुनेछन् ।

लिभरपुललाई चोटको समस्या हुनेछैन । लिभरपुलसँग मोहम्मद सलाह, साडियो माने, रोबर्टाे फिर्मिन्हो, जर्जिन्हो वाइनल्डम, जोर्डन हेन्डरसन, भर्जिल भान डाइक, ट्रेन्ट एलेसान्दर अर्नाेल्ड र गोलरक्षक एलिसन बेकर जस्ता खेलाडीको साथ रहनेछ । मिडफिल्डर थियागो अलाकान्तराले चेल्सीविरुद्धको खेलबाट डेब्यु गर्ने सम्भावना छ ।

यि दुई टोलीको पछिल्लो २८ खेलको नतिजा हेर्दा लिभरपुल हावी छ । लिभरपुलले ११ खेलमा जित हात पार्दा चेल्सीले ९ खेल जितेको छ । ८ खेल बराबरीमा सकिएको छ । गत वर्षको प्रिमियर लिगको दुवै खेलमा लिभरपुल विजयी हुदा एफए कपमा चेल्सीले हराएको थियो ।

अन्य खेल

साउथह्याम्पटनविरुद्ध टोटेनहम (४ः४५ बजे)

न्युक्यासलविरुद्ध ब्राइटन (६ः४५ बजे)

लेस्टर सिटीविरुद्ध बर्नली (११ः४५ बजे)