एजेन्सी – डिफेन्डिङ च्याम्पियन स्पेनिस महारथी रियल म्याड्रिडले नयाँ सिजनको स्पेनिस ला लिगाको पहिलो खेलमा आज आइतबार राति रियल सोसिडाडसँग प्रतिस्पर्धा गर्दैछ ।

खेल सोसिडाडको मैदानमा नेपाली समय अनुसार राति १२ः४५ बजे हुनेछ । साविक विजेता रियल सिजनको पहिलो खेलमा जित निकाल्दै सुखद सुरुवात गर्ने लक्ष्यमा हुनेछ । रियलको यो लक्ष्यमा करिम बेन्जेमा मुख्य हतियार बन्नेछन् ।

इडेन हाजार्ड, भिनिसियस जुनियर, रोड्रिगो, लुका मोड्रिच, क्यासमिरो, टोनी क्रुस, कप्तान सर्जियो रामोस, मार्सेलो, राफयल भरान, ड्यानियल कार्भाजल र गोलरक्षक थिवाउट कोर्टुवा रियलसँग हुनेछ । मार्टिन ओडेगार्डले रियलको सिनियर टोलीमा लामो समयपछि खेल्ने सम्भावना छ ।

सन् २०१४–१५ को सिजनमा एक खेलमा मात्रै मौका पाएका ओडेगार्डले त्यसपछि तीन सिजन लोनमा बिताएका थिए । फेडरिको भाल्भेर्डे, फर्लान्ड मेन्डी, मार्काे एसेन्सियो, इस्को र लुकास भास्क्वेजले सब्सिच्युट खेलाडीको रुपमा आएर खेलमा प्रभाव जमाउन सक्नेछ ।

यता, सोसिडाड पनि रियललाई स्तब्ध पार्दै सुखद सुरुवात गर्ने दाउमा हुनेछ । अघिल्लो सिजन ला लिगाको दुवै खेलमा पराजित भएपनि सोसिडाडले कोपा डेल रेमा ४–३ को जित निकालेको थियो । सोसिडाड सोही प्रदर्शनलाई निरन्तरता दिने योजनामा हुनेछ । क्रिस्टियन पोर्टु, एलेसान्डर इसाक, मिकेल ओएरजावाल, रोबर्टाे लोपेज र डिएगो लोरेन्टोले जस्ता खेलाडीको साथ सोसिडाडलाई हुनेछ ।

यि दुई टोली २१ पटक भिड्दा १६ खेलमा रियल विजयी भएको छ । ४ खेलमा सोसिडाड सफल हुदा १ खेल बराबरीमा सकिएको छ ।

अन्य खेल :

एसडी हुएस्काविरुद्ध काडिज (राति ७ः४५ बजे)

ग्रानडाविरुद्ध डिपोर्टिभो एलाभेस (राति १०ः१५ बजे)

रियल बेटिसविरुद्ध रियल भालाडोलिड (राति १०ः१५ बजे)