एजेन्सी – साविकको विजेता पेरिस सेन्ट जर्मेन (पीएसजी) ले फ्रेन्च लिग वानमा लगातार दोस्रो जित दर्ता गरेको छ ।

सुरुवाती दुई खेलमा पराजित भएर तेस्रो खेलमा मेट्जलाई पराजित गर्दै लय समातेको पीएसजीले आइतबार निसलाई उसकै मैदानमा ३–० को सहज जित निकालेको हो । पीएसजीको जितमा एमबाप्पे र डि मारियासँगै कप्तान मार्किन्हसले गोल गरे ।

एलिएन्ज रिभिइरामा निसमा भएको प्रतिस्पर्धात्मक खेलमा पीएसजीले गोलको लागि पेनाल्टीको सहारा लिनुपरेको थियो । खेलको १७औं मिनेटमा एन्जल डि मारियाको प्रहारलाई निसका गोलरक्षक वाल्टर बेनिटेजले बचाएपछि पीएसजी अग्रता लिनबाट चुकेको थियो । १९औं मिनेटमा पीएसजीका गोलरक्षक केलर नाभासले उत्कृष्ट बचाउ गर्दै निसको अग्रता टारे ।

२५औं मिनेटमा केलियन एमबाप्पेले गोलको सुवर्ण अवसर खेर फाल्यो । ३४औं मिनेटमा रोनी लोपेसले गरेको क्रसले पीएसजीका गोलरक्षक नाभासलाई बिट गरेपनि पोस्टबाट थोरै बाहिरियो ।

३८औं मिनेटमा एमबाप्पेले पेनाल्टीमार्फत गोल गर्दै पीएसजीलाई १–० को अग्रता दिलाए । डिफेन्डर युसेफ एटललाई बिट गरेपनि खेपरेन थुरामल एमबाप्पेलाई फल गरेपछि प्राप्त पेनाल्टीमा एमबाप्पे आफैले गोल गर्न सफल भएका थिए ।

४०औं मिनेटमा एन्जल डि मारियाको फ्रिकिकमा एन्डर हेरेराको हेडर डिफ्लेक्ट हुदै पोस्टबाट थोरै बाहिरिएको थियो । ४२औं मिनेटमा लोपेसले कप्तान मार्किन्हसलाई बिट गर्दै गरेको प्रहारलाई नाभासले उत्कृष्ट बचाउ गर्दै बराबरी टारे ।

पहिलो हाफको इन्ज्युरी समयमा एन्जल डि मारियाले गोल गर्दै पीएसजीलाई पहिलो हाफमा २–० को अग्रता दिलाए । केलियन एमबाप्पेले मैदानको मध्यभागबाट एक डिफेन्डरलाई बिट गर्दै अघि बढाएर अर्काे डिफेन्डरलाई बिट गर्दै गरेको प्रहारलाई निसका गोलरक्षक बेनिटेजले नियन्त्रणमा लिन नसकेको बललाई डि मारियाले रिवाउन्डमा जाली चुमाएका थिए ।

दोस्रो हाफको शुरुमै घरेलु टाली निसले गोल अन्तर कम गर्ने सुवर्ण अवसर गुमायो । हस्साने कामराको क्रसमा एमिन गौउरीको प्रहारलाई नाभासले छेके । ५३औं मिनेटमा नाभासले अर्काे उत्कृष्ट बचाउ गरे । ५९औं मिनेटमा मोउरो इकार्डीको प्रहारलाई निसका गोलरक्षक बेनिटेजले विफल पारे । ६३औं मिनेटमा इकार्डीको प्रहार पोस्टमा लागेर फर्कदा पीएसजी अग्रता बढाउनबाट चुक्यो ।

६६औं मिनेटमा कप्तान मार्किन्हसले गोल गर्दै पीएसजीलाई ३–० को अग्रता दिलाए । एन्जल डि मारियाको फ्रिकिकमा मार्किन्हसले हेडरमार्फत गोल गरेका थिए । ७८औं मिनेटमा नाभासले अर्काे उत्कृष्ट बचाउ गरे । त्यसपछि थप गोल निस्कन नसक्दा पीएसजी ३–० को विजयी हुन सफल भयो । जितसँगै पीएसजीले ४ खेलबाट ६ अंक जोडेको छ । पराजित निसको पनि ४ खेलबाट ६ अंक नै छ ।