एजेन्सी – फरवार्ड साडियो मानेले उत्कृष्ट प्रदर्शन गर्दा इंग्लिस प्रिमियर लिग च्याम्पियन लिभरपुलले नयाँ सिजनमा लगातार दोस्रो जित दर्ता गर्ने क्रममा लन्डन क्लब चेल्सीलाई २-० ले पराजित गरेको छ ।

लिभरपुलको जितमा दुवै गोल मानेले नै गरे । पहिलो हाफको अन्तिम मिनेटमा चेल्सीका डिफेन्डर आन्द्रिएस क्रिस्टेनसनले रातो कार्ड पाएपछि लिभरपुलको जित सहज भएको थियो । गोलरहित पहिलो हाफमा दुवै टोलीले प्रतिस्पर्धात्मक खेल खेलेपनि दोस्रो हाफमा लिभरपुलले कमजोर डिफेन्सको फाइदा उठाउँदै गोल गर्न सक्यो ।

मानेले दोस्रो हाफको ५० औं मिनेटमा गोल गर्दै लिभरपुललाई अग्रता दिलाएका थिए । उनले रोबर्टो फिर्मिनोको पासलाई गोलमा परिणत गरे । त्यसको तीन मिनेटपछि नै मानेले अग्रता दोब्बर पारे । गोलरक्षक केपाले क्लियर गर्न खोजेको बललाई खोस्दै मानेले जिततर्फ अग्रसर गराएका थिए ।

चेल्सीले खेलको ७५ औं मिनेटमा खेलमा फर्कने सुवर्ण अवसर प्राप्त गर्यो । टिमो वेर्नरलाई डेब्यु गरिरहेका थियागोले पेनाल्टी क्षेत्रभित्र फल गरेपछि रेफ्रीले भीएआरको सहायता लिँदै पेनाल्टी दिएका थिए । इटालियन मिडफिल्डर जोर्जिन्होले गरेको प्रहार गोलरक्षक एलिसनले बचाउँदै २ गोलको अग्रता कायम राखे ।

थप समयमा गोल हुन नसक्दा च्याम्पियन लिभरपुलले शत प्रतिशत जितको सुरुवातलाई निरन्तरता दिन सक्यो । यता चेल्सी भने लिगको पहिलो हार भोग्न बाध्य भएको छ । लिभरपुलका लागि डेब्यु गरेका थियागोले दोस्रो हाफ मात्र खेलेपनि मिडफिल्डमा उच्च प्रदर्शन गरे ।