एजेन्सी – इंग्लिस प्रिमियर लिगमा आज (सोमबार) राति दुई खेलमा प्रतस्पर्धा हुदैछ । एस्टन भिल्लाले सेफिल्ड युनाइटेडको आतिथ्यता गर्दा साविकको उपविजेता म्यानचेस्टर सिटी वल्भ्स भ्रमणमा निस्कनेछ ।

एस्टन भिल्ला र सेफिल्डबीचको खेल राति १०ः४५ बजे तथा वल्भ्स र म्यानचेस्टर सिटीबीचको खेल राति १ बजे हुनेछ । नयाँ सिजनको प्रिमियर लिगमा सिटीले पहिलो खेलमा प्रतिस्पर्धा गर्दा वल्भ्सको यो दोस्रो खेल हो ।

सिटी वल्भ्सलाई उसकै मैदानमा हरार सुखद सुरुवात गर्ने योजनामा रहँदा वल्भ्स लगातार दोस्रो जितको खोजीमा मैदानमा उत्रनेछ । वल्भ्सले पहिलो खेलमा सेफिल्डमाथि २–० को सहज जित हात पारेको थियो ।

सिटीले चोटका कारण क्लबका सर्वाधिक गोलकर्ता सर्जियो अगुइरोलाई गुमाउनेछन् । तर सिटीसँग रहिम स्ट्रलिङ, ग्याब्रियल जेसस, रोड्री, केभिन डि ब्रुयन, बेन्जामिन मेन्डी, केल वाल्कर र गोलरक्षकमा इडर्सन हुनेछन् । इल्काए गुन्डोगन कोरोना संक्रमणका कारण हाल आइसोलेसनमा रहेका छन् ।

कोरोनामुक्त हुदै रियाद महरेज भने टिममा फर्केका छन् । यस्तै नयाँ खेलाडी नाथन एके र फेरान टोरेसले डेब्यु गर्ने सम्भावना छ । पछिल्लो समय लयमा रहेको वल्भ्सलाई पराजित गर्न पेप ग्वार्डिओलाको सिटीले मिहेनत नै गर्नुपर्नेछ ।

यता, पहिलो खेलमा पाएको सफलताले हौसिएको वल्भ्स दोस्रो खेलमा पनि सिटीलाई स्तब्ध पार्दै लगातार दोस्रो जितको खोजीमा हुनेछ । यसै साता फरवार्ड डिएगो जोटालाई लिभरपुलमा बेचेपनि वल्भ्ससँग राहुल जिमिनेज, ड्यानियल पोडेन्स, एडमा ट्राओरे, पेड्रो नेटो जस्ता स्तरीय फरवार्ड छन् । मिडफिल्डमा जोओ मौटिन्हो र रुवेन नेभेसले खेल्न सक्नेछन् । विली बोली कोनर कोडे र रोमेन साइसले रक्षापङ्ति सम्हाल्दा रुइ प्याट्रिसियोले गोलरक्षकमा रहनेछन् ।

यि दुई टोली ११ पटक आमने समाने हुदा सिटीले पाँच खेलमा सफलता हात पार्दा ३ खेलमा वल्भ्स विजयी भएको छ । ३ खेल बराबरीमा टुंगिएको छ ।

गत सिजनको प्रिमियर लिगको दुवै खेलमा वल्भ्स विजयी भएको थियो । वल्भ्स यही जितलाई निरन्तरता दिने लक्ष्यमा हुनेछ । वल्भ्स सिटीसँग पछिल्ला ३ खेलमा अपराजित छ । सिटी पनि वल्भ्ससँगको हारको यात्रा पुर्णविरामा लगाउने दाउमा हुनेछ ।