एजेन्सी – क्याटलान क्लब बार्सिलोनाका उरुग्वेली फरवार्ड लुइस सुआरेज स्पेनिस क्लब एट्लेटिको म्याड्रिड जान सक्ने सम्भावना बढेको छ ।

सुआरेजले इटालीको नागरिकता पाउन समय लाग्ने भएपछि इटालियन महारथी युभेन्टसले सुआरेज अनुबन्धबाट हात झिकेपछि उनी अर्काे स्पेनिस क्लबसँग जोडिएका हुन् । बार्सिलोनाले यसअघि नै सुआरेज आफ्नो योजनामा नरहेको बताइसक्दा प्रशिक्षक रोनाल्ड कोम्यानले सुआरेजलाई फोनमार्फत नै आफ्नो योजनामा नरहेको बताइसकेका छन् ।

सुआरेज एट्लेटिको म्याड्रिड आउने एकमात्रै सम्भावना रहेको छ । जसका लागि एट्लेटिकोले आफ्ना चेल्सीका फ्लप स्पेनिस फरवार्ड अल्भारो मोराटालाई लोनमा युभेन्टस पठाएर सुआरेजलाई अनुबन्ध गर्न सक्नेछ ।

स्पेनिस आउटलेट आरएसीका अनुसार युभेन्टसमा ढोका बन्द भएपछि सुआरेजको अर्काे गन्तव्य एट्लेटिको म्याड्रिड रहेको बताएका छन् । सुआरेजको प्रस्थानले एट्लेटिकोलाई इंग्लिस क्लब चेल्सीका पुर्व फरवार्ड मोराटालाई लोनमा पठाउने सम्भावना छ ।

सुआरेजले गत साता नै इटालीको नागरिकताका लागि परिक्षा दिएर उतिर्ण पनि भइसकेका छन् । ट्रान्सफर विन्डो अक्टोबर ५ मा सकिने हुदा सो समयभित्र नै सुआरेजको नागरिकताको कागजी प्रक्रिया नसकिने भएकाले युभेन्टसका प्रशिक्षक आन्द्र पिर्लाेले सुआरेज अनुबन्ध तत्काल सम्भव नरहेको बताएका छन् । नन युरोपियन खेलाडीको रुपमा अनुबन्ध गर्नको लागि पनि युभेन्टसको कोटा पुगिसकेको छ । युभेन्टसमा नन युरोपियनका दुई खेलाडी आर्थर मेलो र वेस्टन म्याकेनी आइसकेका छन् ।

इटालियन आउटलेट गेज्जेट डेल्लो स्पोर्टले प्रशिक्षक पिर्लाेको भनाईलाई उद्दृत गर्दै सुआरेज अनुबन्ध गाह्रो रहेको उल्लेख गरेका छन् । ‘सुआरेजको नागरिकता र राहदानी प्रक्रिया लामो छ । त्यसकारण यो अनुबन्ध तत्कालका लागि जटिल छ ।’

युभेन्टसमा उनको अनुबन्ध हुने सम्भावना सकिएपछि एट्लेटिको सुआरेज अनुबन्धमा जोडिएको छ । एट्लेटिकोका प्रशिक्षक डिएगो सिमिओनले आफ्ना फरवार्ड डिएगो कोस्टाको साथ खोजिरहेको छ । २७ वर्षीय स्पेनी खेलाडी मोराटाले दुई सिजन युभेन्टसबाट खेलिसकेका छन् । उनले युभेन्टसबाट ९३ खेलमा ३७ गोल गरेका थिए । युभेन्टस २०१५ मा युइएफए च्याम्पियन्स लिगको फाइनलमा प्रवेश गर्दा मोराटा टोलीका महत्त्वपुर्ण सदस्य रहेका थिए ।