एजेन्सी – स्विडिस फरवार्ड ज्लाटन इब्राहिमोभिचको उच्च प्रदर्शनमा एसी मिलानले इटालियन सिरी ए अन्तर्गत सोमबार राति बोलोग्नामाथि २-० को जित दर्ता गर्यो ।

मिलानको जितमा दुवै गोल ज्लाटनले नै गरेका थिए । तर उनले खेलपछि बोल्ने क्रममा आफू युवा उमेरको भएको भए ४ गोल गर्न सक्ने दावी गरे । ज्लाटनले पहिलो हाफमा थिओ हर्नान्डेजको क्रसमा हेडरमा गोल गर्दै अग्रता दिलाएका थिए । दोस्रो हाफमा उनले पेनाल्टीमार्फत अग्रता दोब्बर पारे ।

ज्लाटनले दोस्रो हाफमा ह्याट्रिक पूरा गर्ने अवसर पनि पाएका थिए । गोलरक्षक लुकास स्कोरुप्सकीलाई छलाएर ज्लाटनले गरेको प्रहार पोस्टभन्दा केहि माथिबाट गयो । ज्लाटनले व्यक्तिगत ह्याट्रिक मात्र होइन लिगको इतिहासमा नै ह्याट्रिक पूरा गर्ने सबैभन्दा बढी उमेरको खेलाडी बन्ने किर्तिमानबाट पनि चुके ।

‘म एकदम राम्रो स्थितिमा छु । यो नयाँ सिजनको दोस्रो औपचारिक खेल हो । हामीले जित हासिल गर्यौं, तर म अझौ गोल गर्न सक्थें । आजको खेलमा मेरो उमेर २० वर्ष हुँदो हो त मैले अझ २ गोल थप्न सक्थें । म बेन्जामिन बटन जस्तै हुन्, म बुढो जन्मिए र युवा भएर मर्नेछु,’ ज्लाटनले भने ।

मिलानले नयाँ सिजनमा सकारात्मक सुरुवात गरेको छ । गत सिजन अन्तिम १२ खेलमा ९ जित र ३ बराबरी गरेको मिलानका लागि ज्लाटनले उच्च प्रदर्शन गरेका थिए । लिगमा खेलेका १८ खेलमा उनले १० गोल र ५ असिस्टको योगदान दिएका थिए ।

‘हामी अझै शत प्रतिशत तयार भइसकेका छैनौं । हामीले सामान्यतया नगर्ने गल्ति पनि गरिरहेका छौं । आज पिलो खेल जितेर सुखद सुरुवात गर्न आवश्यक थियो । हाम्रो लक्ष्य पछिल्लो सिजनभन्दा राम्रो नतिजा ल्याउनु हो ।’

‘युवा खेलाडीहरुले पनि राम्रो प्रदर्शन गरिरहेका छन् । उनीहरु मिहिनेत गर्छन, हामीले भनेको सुन्छन् र अनुशासित छन् । हरेक दिन कडा परिश्रम गरेर ध्यान दिनुपर्छ भन्ने बुझेका छन् । हामीले यसपटक एक-एक खेललाई लिएर अगाडी बढेको छौं । हरेक खेललाई फाइनलको रुपमा हेर्नेछौं ।’

‘म जिम्मेवारी लिन उत्सुक छु । सबैभन्दा बढी दबाब आफैंबाट हुन्छ । म कसैले पनि मेरो उमेरबारे चर्चा गरेको हेर्न चाहन्न । म सबैलाई उस्तै स्तरमा मापन गरेको हेर्न चाहन्छु । म ३८ वर्ष भए भन्दैमा अरुको तुलनामा कुनै छुट नहोस ।’