एजेन्सी – पोर्चुगिज क्लब स्पोर्टिङ (सीपी) लिस्वनले आफ्नो पुर्व फरवार्ड क्रिस्टियानो रोनाल्डोको सम्मानमा एकेडेमीको नाम नै ‘एकेडेमिया क्रिस्टियानो रोनाल्डो’ नामाकरण गरेका छन् ।

लिस्वनले रोनाल्डो क्लब इतिहासकै सर्वोकृष्ट खेलाडी भएको कारण उनको नाममा एकेडेमीको नामाकरण गरिएको जनाएको छ । पोर्चुगलका कप्तान समेत रहेका ३५ वर्षीय रोनाल्डोले लिस्वनबाटै आफ्नो व्यावसायिक करियरको सुरुवात गरेका थिए ।

रोनाल्डो १९९७ देखि २००२ सम्म लिस्वनबाट आफ्नो युथ करियर विकास गरेका थिए । त्यसपछि उनले लिस्वनको ‘बी’ टिम हुँदै सिनियर टोलीमा समेत आफ्नो प्रभाव छाडेका थिए । त्यसबेला उनी पोर्चुगिज लिगको उत्कृष्ट युवा खेलाडीको रुपमा स्थापित भइसकेका थिए । लिस्बनमा उच्च प्रदर्शन गरेपछि उनी इंग्लिस क्लब म्यानचेस्टर युनाइटेड र प्रशिक्षक सर एलेक्स फर्गुसनको नजरमा परेका थिए ।

लिस्बनमा ए सिजन बिताएपछि नै उनी १८ वर्षको उमेरमा १२ मिलियन पाउन्डमा युनाइटेडमा अनुबन्ध भएका थिए । उनले युनाइटेडमा रहँदा तीनपटक प्रिमियर लिग, एकपटक च्याम्पियन्स लिग र एकपटक बालोन डिओर जितेका थिए । लिस्बनका लागि उनले ३१ खेलमा ५ गोल गरेका थिए । युनाइटेड आएपछि भने रोनाल्डो विश्वकै उत्कृष्ट फरवार्डको रुपमा चिनिएका थिए ।

प्रिमियर लिग क्लबमा ६ वर्ष बसेर रोनाल्डो सन् २००९ मा स्पेनिस क्लब रियल मड्रिड आएका थिए । रोनाल्डो रियलमा ९ वर्ष बिताएर २०१८ मा युभेन्ट्स आएका हुन् । रोनाल्डोले क्लब फुटबलमा सबै उपाधि जितेका छन् । रोनाल्डो तीन फरक देशको लिगको उपाधि जित्ने खेलाडी समेत हुन् । रोनाल्डोले सेप्टेम्वर दोस्रो साता मात्रै पोर्चुगलका लागि १ सय १ गोलको आँकडा पार गरेका छन् ।

यही आधुनिक फुटबलमा आफ्नो प्रभाव जमाउन सफल रोनाल्डोको सम्मानमा एकेडेमीको नाम नै ‘एकेडेमिया क्रिस्टियानो रोनाल्डो’ राखेको विज्ञप्तिमार्फत जानकारी गराएको छ । ‘क्रिस्टियानो रोनाल्डोले यस क्लबलाई आफ्नै घर बनाएका छन् । अब उनै विश्वको सर्वश्रेष्ठ खेलाडी, पोर्चुगलका महान खेलाडी, पाँच पटकको बालोन डिओर विजेता, पाँचपटकको च्याम्पिपयन्स लिग विजेता र पोर्चुगलको कप्तान उनको नामको सम्मानमा एकेडेमीको नाम नै ‘एकेडेमिया क्रिस्टियानो रोनाल्डो’ राखेका छौं,’ क्लबले जारी गरेको विज्ञप्तिमा उल्लेख छ ।

क्लबले एकेडेमीको यो नामले अन्य युवा प्रतिभाहरुलाई माथि आउन थप प्रेरणा मिल्ने बताएको छ । क्लबले एकेडेमीको नाम नै ‘एकेडेमिया क्रिस्टियानो रोनाल्डो’ घोषण गरेपनि आधिकारिक रुपमा उपयुक्त मितिमा घोषणा गर्ने बताएको छ ।