एजेन्सी – इन्ज्युरी समयमा गोल गरेपछि पोर्चुगलले यूईएफए नेसन्स लिग अन्तर्गत समूह ए३ को अन्तिम खेलमा क्रोएसियालाई ३-२ ले पराजित गरेको छ । खेलमा एक समय पछि परेपनि पोर्चुगल पुनरागमन गर्दै जित हासिल गर्न सफल रहयो ।

क्रोएसियाले खेलको २९ औं मिनेटमा माटियो कोभाचिचको गोलमा अग्रता लिएको थियो । मारियो पसलीचको क्रसमा कोभाचिचको पहिलो प्रहार गोलरक्षक रुइ पाट्रीसियोले विफल पारेपनि रिबाउन्डमा कोभाचिचले नै गोल गर्न सफल रहे ।

पहिलो हाफमा १-० ले पछि परेको पोर्चुगलले दोस्रो हाफमा खेलमा फर्कने अवसर पायो । ५१ औं मिनेटमा क्रोएसियाका मारको रोगले दोहोरो पहेंलो कार्ड पाएपछि टोली १० खेलाडीमा समेटियो । त्यसको २ मिनेट नबित्दै पोर्चुगल खेल बराबर गर्न सफल रहयो ।

डिफेन्डर रुबेन डियासले सेट पिस अवस्थामा ६ यार्ड बक्स नजिकबाट गोल गरेका थिए । कप्तान क्रिस्टियानो रोनाल्डोले गरेको शक्तिशाली प्रहारलाई गोलरक्षक डोमिनिक लिभाकोभिचले बचाउन खोज्दा रिबाउन्डमा रुबेन सेमेडोको पासलाई रुबेन डियासले गोलमा परिणत गरे ।

६१ औं मिनेटमा नै पोर्चुगलले अग्रता लियो । डिओगो जोटाको पासमा जोआओ फेलिक्सको प्रहार गोलरक्षक र दुई डिफेन्डरको बीचबाट गोल भएको थियो । तर त्यसको ४ मिनेटपछि नै कोभाचिचले खेल बराबरीमा ल्याए । उनले निकोला भ्लासिचको पासमा पेनाल्टी क्षेत्र बाहिरबाट गरेको शक्तिशाली प्रहार गोलमा परिणत भएको थियो ।

निर्धारित समयको अन्तिम मिनेटमा पोर्चुगलले विजयी गोल गर्न सफल रहयो । बर्नार्डो सिल्भाको क्रसलाई क्रोएसियाको गोलरक्षक लिभाकोभिचले बचाएपनि ल्यान्ड गर्ने क्रममा आफ्नै डिफेन्डरलाई लाग्दै बल फुस्केपछि रुबेन डियासले गोल गर्दै पोर्चुगललाई जित दिलाए ।

यस समूहको अर्को खेलमा फ्रान्सले स्विडेनमाथि ४-२ को जित दर्ता गरेपछि क्रोएसिया रेलिगेसनबाट जोगियो । फ्रान्स ६ खेलमा अपराजित रहँदै १६ अंकका साथ अन्तिम चारमा प्रवेश गर्यो । पोर्चुगल १३ अंकसाथ दोस्रो स्थानमा रहयो । क्रोएसिया र स्विडेनको समान ३-३ अंक भएपनि गोलअन्तरमा क्रोएसियाले स्विडेनलाई उछिन्न सफल रहयो ।

यो पनि : जर्मनीमाथि स्पेनको आधा दर्जन गोल