एजेन्सी – पोर्चुगिज सुपरस्टार फरवार्ड क्रिस्टियानो रोनाल्डोको कीर्तिमानी गोलमा इटालियन क्लब युभेन्टसले युइएफए च्याम्पियन्स लिगमा युक्रेनी क्लब डेनामो किएभमाथि सहज जित हात पारेको छ ।

घरेलु मैदानमा युभेन्टसले किएभमाथि ३–० को सहज जित निकालेको हो । युभेन्ट्सको जितमा रोनाल्डोसँगै अल्भारो मोराटा र फेडरिको चियसाले गोल गरे ।

३५ वर्षीय रोनाल्डोले किएभविरुद्ध एक गोल गर्दै आफ्नो व्यवसायिक खेल करियरको ७५०औं गोल पुरा गरेका हुन् । रोनाल्डोले स्पेनिस क्लब रियाल म्याड्रिडबाट ४५०, इंग्लिस क्लब म्यानचेस्टर युनाइटेडबाट ११८, पोर्चुगलको राष्ट्रिय टोलीबाट १०२, युभेन्टसबाट ७५ र पोर्चुगिज क्लब स्पोर्टिङ लिस्वनबाट ५ गोल गरेका छन् ।

यस्तै यस खेलबाट नै स्टेफेन फ्रापपार्ट च्याम्पियन्स लिग खेलाउने पहिलो महिला रेफ्री बनेकी छिन् । फ्रान्सकी स्टेफेन फ्रापपार्टले गत वर्ष अप्रिलमा फ्रेन्च लिग वान खेलाएकी थिइन् । उनले च्याम्पियन्स लिगको डेब्यु खेलमा तीन खेलाडीलाई पहेलो कार्ड देखाइन् । किएभको एक पेनाल्टीलाई अस्वीकार गरेकी थिइन् ।

एलिएन्ज स्टेडियम टोरिनोमा बुधबार राति भएको खेलमा घरेलु टोलीले खेलको २१औं मिनेटमा फेडरिको चियासाको गोलबाट अग्रता लिएको थियो । उनले एलेक्स सान्द्रोको पासमा गोल गरेका थिए ।

५७औं मिनेटमा रोनाल्डोले अल्भारो मोराटाको पासमा गोल गर्दै युभेन्टसको अग्रता दोब्बर पारे । ६६औं मिनेटमा फेडरिको चियसाको पासमा मोराटाले गोल गर्दै युभेन्टसलाई ३–० को सहज जित दिलाए ।

यो जितसँगै समूह ‘जी’ मा युभेन्टस १२ अंक जोडेर दोस्रो स्थानमा रहेको छ । शीर्षस्थानको बार्सिलोनाको १५ अंक छ । किएभ र फेरेन्कभारोसको समान १ अंक छ ।