एजेन्सी – थोमस मुलरको दुई गोल सहयोगमा शीर्षस्थानमा रहेको बायर्न म्युनिख हारबाट जोगिएको छ । बायर्न म्युनिख र आरबी लाइप्जिगले ३–३ गोलको रोमाञ्चक बराबरी खेल्दै अंक बाँडेका हुन् ।

बायर्नको घरेलु मैदान एलिएन्ज एरिनामा शनिबार राति भएको खेलमा घरेलु टोलीका लागि थोमस मुलरले दुई गोल गर्दा जमल मुसिएलाले एक गोल गरेका थिए । लाइप्जिगका क्रिस्टोफोर एनकुकु, जस्टिन क्लुभर्ट र इमिल फोर्सवर्गले गोल गरे ।

खेलको १९औं मिनेटमा क्रिस्टोफोर एनकुुकुकको गोलबाट लाइप्जिगले अग्रता लिएको थियो । उनले इमिल फोर्सवर्गको पासलाई सदुपयोग गरेका थिए । ३०औं मिनेटमा जमल मुसिएलाले किङ्सले कोमानको पासमा गोल गर्दै खेललाई १–१ गोलको बराबरीमा ल्याए ।

३४औं मिनेटमा कोमानकै पासमा थोमस मुलर गोल गर्दै बायर्नलाई २–१ को अग्रता दिलाए । तर बायर्नको त्यो अग्रता दुई मिनेट पनि टिकेन ३६आं मिनेटमा जस्टिन क्लुभर्टले गोल गर्दै खेललाई पहिलो हाफमा २–२ गोलको बराबरीमा ल्याए । उनले एमाडोउ हैडाराको पासलाई सदुपयोग गरेका थिए ।

४८औं मिनेटमा इमिल फोर्सवर्गले एन्जेलिनोको पासमा गोल गर्दै लाइप्जिगलाई पुनः ३–२ ले अघि बढाए । ७५औं मिनेटमा कोमानकै पासमा थोमस मुलरले व्यक्तिगत दोस्रो गोल गर्दै खेललाई ३–३ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा टुगिंयो ।

यो बराबरीले शीर्ष दुई स्थानमा कुनै फेरबदल भएन । शीर्षस्थानको बायर्नको १० खेलबाट २३ तथा समान खेलबाटै लाइप्जिगको २१ अंक रहेको छ ।

यस्तै अर्काे खेलमा बोरुसिया डर्टमुन्डले फ्रान्कफुर्टसँग १–१ गोलको बराबरी खेलेको छ । फ्रान्कफुर्टका दाइची कामादाले गोल गर्दा डर्टमुन्डका जियोभानी रेनाले बराबरी गोल फर्काएका थिए । यो बराबरीले डर्टमुन्ड १९ अंक जोडेर तेस्रो स्थानमा यथावत रहँदा फ्रान्कफुर्ट १३ अंकसहित आठौं स्थानमा रहेको छ ।

अन्य नतिजा
अर्मेनिया बिलेफिल्डविरुद्ध मेइन्ज (१–१), कोल्नविरुद्ध वल्फ्सवर्ग (२–२), फ्रेइवर्गविरुद्ध बोरुसिया मोन्चेनग्लाडवाक (२–२),