एजेन्सी – रियल म्याड्रिडका कप्तान सर्जियो रामोस प्रशिक्षणमा फर्केका छन् । ला लिगामा शनिबार सेभिल्लालाई हराएको रियल आइतबार अभ्यासमा फर्कदा कप्तान रामोस पनि सामेल भएका हुन् । उनले चोटका कारण पछिल्ला केहि खेल गुमाएका थिए ।

बोरुसिया मोन्चेग्लाडबाकविरुद्ध हुने च्याम्पियन्स लिगको महत्त्वपूर्ण खेलमा फर्कने अपेक्षासहित रामोस तयारीमा जुटेका हुन् । च्याम्पियन्स लिगको अघिल्लो चरण प्रवेशका लागि निकै महत्त्वपूर्ण रहेको छ । समूहमा रहेका सबै टोलीको नकआउट चरणमा पुग्ने सम्भावना जीवित रहेकाले पनि अन्तिम दुई खेल निर्णायक हुनेछन् ।

डानी कार्भाजाल भने च्याम्पियन्स लिग खेलको तीन दिन अघि सम्म पनि फर्कनेमा शंका छ । रामोस टोलीका लागि निर्णायक खेल गुमाउन चाहदैनन् । उनले त्यो खेललाई उच्च प्राथमकितामा राखेका छन् । प्रशिक्षक जिनेदिन जिदानले पनि परिस्थितिलाई गम्भिरतापूर्वक हेरिरहेका छन् ।

कार्भाजालको अवस्थालाई पनि जिदानले नजिकबाट नियालेका छन् । राइट ब्याक अझै पनि आफ्नो गतिमा फर्कन सकेका छ्रैनन् । फेडे भालभर्डेको अवस्थामा पनि कार्भाजालकै जस्तो छ । समूहमा नभएर एक्लै अभ्यास गरिरहेका छन् ।

यो साता उनी खेलमा फर्कने सम्भावना कम रहेको बताइन्छ । मारियानो डेइज र इडन हाजार्ड पनि अलग्गै अभ्यास गरिरहेका छन् । सेभिल्लासँग खेलेका खेलाडीले भने आइतबार सामान्य अभ्यास मात्र गरे । वैकल्पिक खेलाडीले भने पूरा अभ्यास गरे ।