एजेन्सी – यूईएफए च्याम्पियन्स लिगमा इंग्लिस क्लब चेल्सीले आज राति समूह चरणको अन्तिम खेलमा रसियन क्लब क्रास्नोडरसँग प्रतिस्पर्धा गर्दैछ ।

खेल चेल्सीको घरेलु मैदान स्टामफोर्ड ब्रिजमा नेपाली समयअनुसार राति १ः४५ बजे हुनेछ । घरेलु मैदानमा क्रास्नोडरविरुद्ध मैदान उत्रदा चेल्सी समूहमा अपराजित रहने लक्ष्यसहित मैदान उत्रनेछ ।

समूह ‘ई’ बाट चेल्सी ५ खेलमा ४ जित र १ बराबरीको नतिजासहित शीर्षस्थानमा रहेर नकआउट चरणमा पुगिसकेको छ । समूह चरणको अन्तिम खेलमा पनि चेल्सी क्रास्नोडरलाई हराउने लक्ष्यमा मैदान उत्रनेछ ।

घरेलु टोलीसँग टिमो वेर्नर, काई हाभर्टज, क्रिस्टियन पुलिसिस, ट्याम्मी अब्राहम, कलुम हड्सन ओडोई, जर्गिन्हो, माटियो कोभासिस, ओलिभर जिरुउड, थियागो सिल्भा, रिस जेम्स, सिजर एज्पिलिक्वेटा, एन्टेनियो रुडिगर, इमर्सन, एङ्गोलो कान्टे, मासन माउन्ट र गोलरक्षक इडुआर्ड मेन्डीको साथ रहेको छ ।

यता, क्रास्नोडर पनि घरेलु टोली चेल्सीलाई कम्तीमा बराबरीमा रोक्दै युरोपा लिगमा रहने योजनामा हुनेछ । क्रास्नोडर र रेनेसमध्ये एक टोलीले युरोपा लिगको प्ले अफमा स्थान बनाउनेछ । क्रास्नोडरको ४ तथा रेनेसको १ अंक छ ।

यही समूहको अर्काे खेलमा फ्रान्सेली क्लब रेनेस र स्पेनिस क्लब सेभियाबीच राति १ः४५ बजे नै प्रतिस्पर्धा हुनेछ ।