एजेन्सी – जर्मन क्लब बोरुसिया डर्टमुन्डका यौस्सोफा मौकोको युइएफए च्याम्पियन्स लिग खेल्ने सबैभन्दा कान्छा खेलाडी बनेका छन् ।

जर्मन युवा फरवार्ड मौकोकोले मंगलबार राति जेनिट सेन्ट पिटर्सवर्गविरुद्ध दोस्रो हाफमा मैदानमा उत्रदै उनी च्याम्पियन्स लिग खेल्ने सबैभन्दा कान्छा खेलाडी बनेका हुन् । मुख्य फरवार्ड एर्लीङ हालान्ड चोटका कारण अनुपस्थित रहेको खेलमा मौकोकोले कुनै समय खेल्ने अनुमान यसअघि नै रहेको थियो । उनले गत साता जर्मन बुन्डेसलिगामा डेब्यु गर्दै कान्छा खेलाडीको कीर्तिमान बनाएका थिए ।

मौकोकोले नाइजेरिया तथा एन्डरलेक्टका सेलेस्टिन बाबायारोले सन् १९९४ मा राखेको कीर्तिमानलाई भंग गरेका हुन् । बाबायोराले त्यतिबेला स्टेएउवा बुचारेस्टविरुद्ध १६ वर्ष ८७ दिनको कीर्तिमान राखेका थिए । मौकोकोले १६ वर्ष १८ दिनको कीर्तिमान राखेका हुन् ।

मौकोको ५८औं मिनेटमा फेलिक्स पासालाकको स्थानमा मैदान छिरेका थिए । जेनिटविरुद्ध उनको प्रदर्शन औसतको रहेको थियो । उक्त खेलमा डर्टमुन्ड २–१ ले विजयी हुदै समूह ‘एफ’ बाट समूह विजेताको रुपमा नकआउट चरणमा पुग्न सफल भएको छ ।

जर्मनीमा सिनियर टोलीबाट खेल्न १६ वर्ष पुग्नैपर्ने नियम रहेकाले मौकोकोले सिनियर टोलीबाट खेल्न केहि प्रतिक्षा गर्नुपरेको थियो । मौकोकोले जर्मन बुन्डेसलिगामा हर्था बर्लिनविरुद्धको खेलमा एर्लिङ ब्राउट हालान्डको स्थानमा मैदान प्रवेश गर्दै डर्टमुन्डको सिनियर टोलीबाट डेब्यु गरेका थिए । उनले बुन्डेसलिगामा डर्टमुन्डबाट ३ खेल खेलिसकेका छन् ।

१२ वर्षको उमेरमा नै डर्टमुन्डको यु–१७ टोलीबाट खेलेका मौकोकोले १४ वर्षको उमेरमा नै यु–१९ टोलीको आक्रमण सम्हालेका थिए । डर्टमुन्डको युवा समूहको प्रतिनिधित्व गर्दै ८४ खेल खेलेका उनले १ सय २७ गोल गरेका छन् । उनको यो प्रतिभाले नै जनवरीदेखि उनी सिनियर टोलीसँग प्रशिक्षण गर्दै आएका थिए ।