एजेन्सी – जर्मन क्लब बायर्न म्युनिखले यूईएफए च्याम्पियन्स लिगमा अपराजित यात्रालाई कायमै राख्दा बुधबार राति रसियन क्लब लोकोमोटिभ मस्कोमाथि २–० को सहज जित निकालेको छ ।

बायर्न २०१९ मार्च १३ मा च्याम्पियन्स लिगको प्रि–क्वाटरफाइनलमा इंग्लिस क्लब लिभरपुलसँग ३–१ ले पराजित भएयता १७ खेलसम्म अपराजित रहेको छ । यसक्रममा बायर्नले १६ जित र १ बराबरीको नतिजा निकालेको छ ।

घरेलु मैदानमा बायर्नको जितमा निकलस सुल र इरिक म्याक्सिम चुपो मोटिङले गोल गरे । दुवै गोल दोस्रो हाफमा सम्भव भएको थियो । खेलको सुरुवातदेखि नै बल पोजेसनमा पकड बनाएको घरेलु टोली बायर्नले गोलको लागि दोस्रो हाफ नै कुर्नुपरेको थियो ।

६३औं मिनेटमा डगलस कोस्टाको पासमा निकलस सुलले गोल गर्दै बायर्नलाई अग्रता दिलाए । ८०औं मिनेटमा सर्ज जिनाब्रीको पासमा मोटिङले गोल गर्दै बायर्नको जित पक्का गरे ।

यो जितसँगै समूह ‘ए’ मा शीर्षस्थानमा रहेको बार्यनले १६ अंक जोड्यो । पराजित लोकोमोटिभ मस्को ३ अंकसहित पुछारमा रह्यो ।

यही समूहको अर्काे खेलमा स्पेनिस क्लब एट्लेटिको म्याड्रिडले अष्ट्रियन क्लब साल्जवर्गलाई उसकै मैदानमा २–० को जित निकाल्दै अन्तिम १६ मा स्थान पक्का गरेको छ । एट्लेटिकोले ६ खेलबाट ९ अंक जोड्यो । पराजित साल्जवर्ग ४ अंकसहित युरोपा लिगमा सीमित बन्यो