एजेन्सी – युरोपियन फुटबलमा पेरिस सेन्ट जर्मेन (पिएसजी) का स्टारद्वय नेयमार र केलियन एमबाप्पेले आपसी तालमेल मिल्ने जोडी मध्ये एकमा पर्दछन् । पछिल्लो तीन वर्षयता उनीहरुको सहकार्यले टोलीको उच्च प्रदर्शनमा मद्दत मिल्दै आएको छ ।

उनीहरुको उच्च प्रदर्शनबाट पे्ररित टोलीले लिग वानमा त राम्रो गरेकै छ गत सिजन उनीहरुले टोलीलाई च्याम्पियन्स लिगको फाइनल पुर्याउन पनि सफल भए । सरुवा बजार खुल्ने नजिक पुग्दा नेयमार र एमबाप्पेले क्लब छाड्न चर्चा पनि सुरु हुने गरेको छ । तर, पिएसजीका अध्यक्ष नासिर अल खालिफा भने उनीहरु क्लबमै रहनेमा विश्वस्त छन् ।

एमबाप्पेका विषयमा भने पछिल्लो समय बढी नै चर्चा हुने गरेको छ । उनको सम्झौता सन् २०२२ सम्म रहेको छ । युरोपियन फुटबलको सफल टोली मध्येको रियल म्याड्रिडले उनलाई भित्राउन चाहेको चर्चा पनि एमबाप्पे पिएसजीमा रहनेमा शंका गरिन्छ ।

‘हामीले नेयमार र एमबाप्पलेसँग छलफल सुरु गरिसकेका छौं,’ अल खालिफाले भने, ‘छलफल गोप्य छन् । तर मलाई विश्वास छ उनीहरु हामीसँग रहन चाहन्छन् ।’ दुवै खेलाडी २०१७ मा क्लबमा आबद्ध भएका थिए । फ्रान्सेली युवा फरवार्ड मोनाकोबाट पिएसजी पुगेका थिए ।

ब्राजिली नेयमार भने बार्सिलोनाबाट विश्व कीर्तिमानी रकममा पिएसजी पुगेका थिए । दुवैको सम्झौता २०२२ को अन्त्य सम्म रहेको छ । पिएसजीले नेयमारका लागि २ सय २२ मिलियन र एमबाप्पेका लागि १ सय ८० मिलियन युरो खर्चेको थियो ।