एजेन्सी – एसियाली च्याम्पियन कतारले फिफा विश्वकप २०२२ को युरोपेली छनोटअन्तर्गत समूह ए मा अतिथि टोलीको रुपमा प्रतिस्पर्धा गर्ने भएको छ ।

बुधबार कतार फुटबल संघले प्रेस विज्ञप्ति जारी गर्दै यूईएफएको आग्रहमा टोलीले युरोपेली छनोटको समूह ए मा प्रतिस्पर्धा गर्ने जनाएको छ । उक्त समूहमा पोर्चुगल, आयरल्यान्ड गणतन्त्र, सर्बिया, लक्जेमबर्ग र अजरबैजान रहेका छन् । कतारले प्रतियोगिताको खेल तालिका अनुसार सबै टोलीसँग २-२ पटक खेल्नेछ ।

कतार विश्वकप २०२२ को आयोजक रहेकाले विश्वकपमा स्थान पक्का गरिसकेको छ । यूईएफएले कतारलाई अनुभव बटुल्न सहज हुने भन्दै अतिथि टोलीको रुपमा सहभागी हुने प्रस्ताव राखेको थियो । उक्त प्रस्तावलाई कतारले सहर्ष स्वीकार्दै यूईएफएलाई यस अवसरका लागि धन्यवाद समेत दिएको छ ।

कतारविरुद्ध खेलको नतिजाले छनोट चरणमा अंक गणना भने हुने छैन । यस्तै समूहका अन्य टोलीलाई आवतजावतमा सहज हुने भन्दै कतारले आफ्नो घरेलु खेल पनि युरोपकै कुनै मैदानमा खेल्नेछ । विगतमा पनि विश्वकप आयोजकले आफ्नो तयारी चुस्त पार्न अतिथि टोलीका रुपमा खेल्ने चलन रहेको थियो ।

सन् २०१९ मा जापानलाई हराउँदै एसियन कप जितेको कतारका लागि अर्को वर्ष निकै व्यस्त हुने भएको छ । कतारले सन् २०२१ जुनमा कोपा अमेरिकामा सहभागिता जनाउँदैछ । त्यसकै एक महिनापछि टोलीले उत्तरी अमेरिकाको कन्काकाफ गोल्ड कपमा पनि खेल्नेछ । सन् २०२१ कै डिसेम्बरमा कतारले अरब कपको पनि आयोजना गर्दैछ ।