एजेन्सी – विश्वभर गरिएको अनलाइन भोटिङका आधारमा बोलोन डि ओर ड्रिम टिम सार्वजनिक भएको छ । फ्रान्स फुटबलले ३–४–३ को पद्धतीमा फुटबल इतिहासको उत्कृष्ट ११ सार्वजनिक गरेको हो ।

बालोन डि ओर ड्रिम टिममा याशिन, काफु, बेकेनबाउर, माल्दिनी, जाभी, म्याथुज, पेले, म्यारोडोना, मेस्सी, रोनाल्डो नाजारियो र क्रिस्टियानो रोनाल्डो छन् । विश्वको नम्बर एक गोलकिपरमा रसियाका महान खेलाडी लेभ यासिन परेका छन् । सोभियत युनियनबाट सन् १९५४ देखि १९७० सम्म खेल्ने क्रममा यासिनले ७४ खेल खेलेका थिए ।

त्यस्तै रक्षापक्तिका उत्कृष्ट ३ मा जर्मनका फेन्च बेकनबाउर, ब्राजिलियन फुलब्याक काफु र इटालियन महान पाब्लो माल्दिनी रहेका छन् । बार्सिलोनाका महान जाभि हर्नान्डेज इतिहासकै सर्वाधिक सफल डिफेन्सिभ मिडफिल्डर चुनिएका छन् । स्पेनिस जाभीले विश्व कप, युरोपियन च्याम्पियनसिप जितेका थिए । त्यस्तै बार्सिलोनाका लागि ४ च्याम्पियन्स लिगसहित थुप्रै उपाधि जाभीले जितेका थिए ।

जाभीसँग डिफेन्सिभ मिडफिल्डमा लोथर म्याथुज छन् । एट्याकिङ मिडफिल्डमा दुई महान अर्जेन्टिनाका डिएगो म्याराडोना र ब्राजिलियन पेले रहेका छन् । म्याराथोनाले लगभग एकल प्रयासमा १९८६ मा अर्जेन्टिनालाई विश्व कप उपाधि दिलाएका थिए । पेलेको सहभागितामा ब्राजिलले १९५८,१९६२ र १९७० मा विश्व कप जितेको थियो ।

अग्रपंक्तिमा इतिहासकै सर्वाधिक रुचाइएका फरवार्डमा ब्राजिलका महान रोनाल्डो नाजिरियो छन् । युवा पुस्तामा लोकप्रिय रोनाल्डोले घुँडाको चोटका कारण खेल छाड्नु परेको थियो । उनको उच्च प्रदर्शनबाट प्रेरित ब्राजिलले २००२ र १९९४ मा विश्व कप जितेको थियो ।

रोनाल्डोसँग फरवार्ड लाइनमा लिओनल मेस्सी र क्रिस्टियानो रोनाल्डो रहेका छन् । मेस्सीले ६ पटक बालोन डि ओ, ६ पटक गोल्डेन बुट, ४ पटक च्याम्पियन्स लिग उपाधि जितेका छन् । उनले बार्सिलोनाको इतिहासलाई नै परिवर्तन गरिदिएको मानिन्छ । त्यस्तो पोर्चुगिज रोनाल्डोले पाँच पटक बालोन डि ओर, पाँच पटक च्याम्पियन्स लिग उपाधि जितेका थिए । उनले रियल म्याड्रिडबाट लगातार तीन पटक च्याम्पियन्स लिग जितेका थिए ।