एजेन्सी – मार्कुस रासफोर्डको दुई तथा एन्थोनी मार्सियालको एक गोल सहयोगमा म्यानचेस्टर युनाइटेडले इंग्लिस प्रिमियर लिगमा सेफिल्ड युनाइटेडमाथि उसकै मैदानमा ३–२ को पूनरागमन जित निकालेको छ ।

युनाइटेडले एक गोलले पछि परेको अवस्थामा पूनरागमन जित निकालेको हो । घरेलु टोली सेफिल्डका लागि दुवै गोल डेभिड म्याकगोल्डरिकले गरेका थिए । ब्रामल लेन सेफिल्डमा बिहीबार राति भएको खेलमा घरेलु टोली सेफिल्डले खेलको पाँचौ मिनेटमा डेभिड म्याकगोल्डरिकको गोलबाट अग्रता लिएको थियो । उनले ओलिभर बुर्कीको पासमा गोल गरेका थिए ।

एक गोलले पछि परेको युनाइटेडले त्यसपछि आक्रमक खेल पस्कदै २६औं मिनेटमा बराबरी गोल फर्काउन सफल भयो । भिक्टर निल्सल लिन्डेलफको पासमा मार्कुस रासफोर्डले गोल गर्दै खेललाई बराबरीमा ल्याए । ३३औं मिनेटमा एन्थोनी मार्सियालले गोल गर्दै युनाइटेडलाई खेलमा २–१ को अग्रता दिलाए ।

५१औं मिनेटमा मार्सियालको पासमा रासफोर्डले व्यक्तिगत दोस्रो गोल गर्दै युनाइटेडलाई खेलमा ३–१ ले अघि बढाए । ८७औं मिनेटमा डेभिक म्याकगोल्डरिकले गोल गर्दै खेललाई ३–२ को अवस्थामा ल्याएपनि त्यसपछि थप गोल निस्कन नसक्दा युनाइटेड विजयी हुन सफल भयो ।

यो जितसँगै युनाइटेड १२ खेलबाट २३ अंक जोडेर छैटौ स्थानमा उक्लदा सेफिल्ड १ अंक जोडेर पुछारमा रहेको छ । युनाइटेड शीर्षस्थानको लिभरपुलभन्दा ५ अंकले पछि छ ।