एजेन्सी – ग्यारेथ बेल र सर्जियो रेगुइलोनपछि टोटेनहमका प्रशिक्षकका प्रशिक्षक जोसे माउरिन्होले रियल म्याड्रिडका अर्को खेलाडीलाई भित्राउन चाहेका छन् ।

माउरिन्होले क्रोएसियन अन्तर्राष्ट्रिय लुका मोड्रिचलाई प्रिमियर लिग क्लबमा फर्काउन प्रयास थालेको बताइएको छ । रियलसँगको मोड्रिचको सम्झौता सन् २०२१ को जुन अन्तिममा सकिने भएकाले पनि माउरिन्होले उनलाई लैजान प्रयास थालेका अनुमान गरिएको छ ।

प्रिमियर लिगमा उच्च प्रदर्शन गरिरहेको टोटनहमले उपाधि दौडलाई मजबुत बनाउनका लागि टोलीलाई खेलाडी थप्ने योजना बनाएको जनाइएको छ । त्यसैले पनि टोटनहम आफ्ना पूर्व मिडफिल्डरलाई नै फर्काउन चाहेको बताइएको छ । टोटेनहमको मिडफिल्ड तुलनात्मक रुपमा केहि कमजोर रहेको छ ।

जनवरी १ बाट मोड्रिचले सुरुवाका लागि जुन सुकै क्लबसँग कुराकानी गर्न सक्नेछन् । जिनेदिन जिदान भने मोड्रिचसँगै सर्जियो रामोस र लुका भाजक्वेजको सम्झौता नविकरण गर्ने प्रयासमा छन् । सबै खेलाडीको सिजनको अन्त्यसँगै सम्झौता सकिँदैछ ।

रियल र मोड्रिचबीच सम्झौता नविकरणका लागि कुनै सम्झौता भइनसकेका कारण पनि माउरिन्होले उनलाई फर्काउने सम्भावनाका बीच प्रयास थालेका हुन् । ३५ वर्षे मिडफिल्डर २०१२ मा टोटनहमबाट रियल पुगेका थिए । जहाँ उनले २ पटक ला लिगा र ४ पटक च्याम्पियन्स लिग उपाधि जिते ।