एजेन्सी – एइबारविरुद्ध ला लिगामा आइतबार हुने खेलमा इडन हाजार्ड नखेल्ने रियल म्याड्रिडका प्रशिक्षक जिनेदान जिदानले बताएका छन् । हाजार्डलाई लिएर अनावश्यक जोखिम नलिने भन्दै आइतबार नखेलाइने उनले बताए ।

‘म कुनै मुर्खतापूर्ण काम गर्न चाहन्न । हतार गर्दा जोखिम हुन्छ,’ उनले भने, ‘आशा गरौं उनी चाडै फर्कनेछन् । उनी शतप्रतिशत फिट हुने क्रममा छन् । उनी खेल्नका लागि तयार छन् । उनी टिमसँग हुनेछन् । समय आएपछि खेल्नेछन् ।’

ला लिगामा बुधबार रियलले ग्रानाडाको सामना गर्दा हाजार्ड खेल्ने आशा गरिएको छ । नोभेम्बर २८ मा मासंपेशीमा चोट लागेयता हाजार्ड मैदान बाहिर रहँदै आएका छन् । सन् २०१९ का क्लबको कीर्तिमानी रकममा बेल्जियम अन्तर्राष्ट्रिय हाजार्ड चेल्सीबाट रियल पुगेका थिए ।

त्यसयता पटक पटकको चोटले पहिलो सिजन रियलका लागि धेरै खेल्न सकेनन् । दबाबका वावजुद पनि जिदानले भने हाजार्डप्रति विश्वास कायम राखे । यो सिजन पनि सुरु ५ खेल हाजार्डले गुमाएका थिए ।

विस्तारै लयमा फर्कने क्रममा उनी पून चोटग्रस्त भएका थिए । त्यसबीचमा उनी कोरोनाबाट पनि संक्रमित भएका थिए । हाजार्ड नहुदा मार्को एसेन्सियो र रोड्रिग्यो जस्ता खेलाडीले त्यो ठाँउ लिन सक्नेछन् ।

शनिबार अभ्यास नगरेको भिनिसकस पनि आइतबारको खेलमा हुनेछैनन् । ‘मलाई लाग्दैन उनी खेल्न सक्छन् । उनीले आराम महसुस गरेका छैनन्,’ जिदानले भने ।