एजेन्सी – रियल म्याड्रिडका फरवार्ड करिम बेन्जेमाले यो सिजनको सुरुवात उत्कृष्ट ढंगले गरेका छन् । रियलले ला लिगामा आइतबार एइबारको सामना गर्दैछ । खेल अघि एइबारका प्रशिक्षक जोसे लुइस मेलडिलेबारले बेन्जेमालाई विश्वका उत्कृष्ट फरवार्ड रहेको बताएका छन् ।

फ्रान्सेली फरवार्डले यो सिजनमा सबै खाले प्रतिस्पर्धाका १६ खेलमा १० गोल गरिसकेका छन् । रियललाई कठीन परिस्थितिबाट सहज अवस्थामा ल्याउन बेन्जेमाले महत्वपूर्ण भूमिका निर्वाह गरिरहेका छन् ।

‘बेन्जेमा विश्वका उत्कृष्ट फरवार्ड हुन किनकी उनी आफूले पाएको सबै भूमिकामा पोख्त छन् । उनी डिफेन्समा र आक्रमणमा उत्तिकै मिहिनेत गर्छन् । अरु खेलाडीलाई सहयोग र गोल पनि गर्छन्,’ मेलडिलेबारले भने, ‘अन्य फरवार्ड पनि छन् जसले राम्रो गरिरहेका छन् र गोल पनि गरिरहेका छन् । तर उनी त्यस्तो खेलाडी हुन् जसले सबै गरेका छन् । उनी मैदानमा हरेक समय सचेत रहन्छन् ।’

बिहीबार मात्र कोपा डेल रे खेलेको एइबारले आज रियलको सामना गर्नेछ । अर्कोतर्फ जिदानको टोलीले मंगलबार रियल सोसिडाडको सामना गरेको थियो । यदि खेलमा हारेमा त्यसमा कम समय पाइएको भन्दै वहाना गर्न नमिल्ने बताएका छन् ।

‘सधै उस्तै हुन्छ भन्ने हुँदैन । कहिले फाइदा हुन्छ, कहिले हुदैन,’ प्रशिक्षक लुइसले भने, ‘तयारीका लागि हामीलाई कम समय रह्यो । तर अन्य टोलीको हकमा पनि त्यहि हो । हामी अहिले ठीक अवस्थामा छैन । यदि हामी हार्यौं भने रियलको भन्दा कम समयका कारण भन्न मिल्दैन ।’

केहि अघि सम्म कमजोर अवस्थामा रहेको रियल लयमा फर्केको संकेत मिलेको छ । ‘एक महिना अघि सम्म रियल खराब अवस्थामा थियो । तर पछिल्लो ५ खेलमा उनीहरुले धेरै सुधार गरे र जिते,’ मेनडिलेबारले भने, ‘रियल अहिले प्रतिस्पर्धामा छ । उनीहरु स्तरीय टोली हुन् । उनीहरुले आफ्नो क्षमता अनुसार खेल्दा रियललाई हराउन कठीन छ । यदि हामी सम्हालिन सकेनौं भने २ वा ३ गोल गर्न सक्छन् । हामीले पूरा गतिका साथ खेल्नुपर्ने हुन्छ । लय बिगार्नु हुन्न र केन्द्रित हुनुपर्छ ।’