एजेन्सी – इंग्लिस प्रिमियर लिगमा म्यानचेस्टर युनाइटेडले लिड्स युनाइटेडमाथि सानदार जित निकालेको छ । घरेलु मैदानमा युनाइटेडले लिड्सलाई ६–२ को फराकिलो अन्तरले पराजित गरेको हो ।

युनाइटेडको फराकिलो जितमा स्कट म्याकटोमिने र ब्रुनो फर्नान्डेसले समान दुई गोल गर्दा भिक्टर निल्सन लिन्डेलफ र ड्यानियल जेम्सले समान एक गोल गरे । लिड्सका लियाम कोपर र स्टुआर्ट डालासले गोल फर्काए ।

ओल्डट्राफोर्डमा आइतबार राति गोलको वर्षा भएको खेलमा युनाइटेडले खेलको तीन मिनेट भित्र नै दुई गोलको अग्रता लिएको थियो । स्कट म्याकटोमिनेले दोस्रो र तेस्रो मिनेटमा गोल गर्दै युनाइटेडलाई अघि बढाएका थिए । उनले ब्रुनो फर्नान्डेस र एन्थोमी मार्सियालको पासमा गोल गरेका थिए ।

२०औं मिनेटमा फर्नान्डेसले गोल गर्दै युनाइटेडलाई खेलमा ३–० को सहज स्थितिमा अघि बढाए । ३७औं मिनेटमा भिक्टर लिन्डेलफले मार्सियालको पासमा गोल गरेपछि युनाइटेड ४–० को आरामदायी स्थितिमा पुग्यो । ४१औं मिनेटमा राफिन्हाको पासमा लियाम कोपरले गोल गर्दै गोलअन्तर ४–१ मा झारे ।

६६औं मिनेटमा स्कट म्याटोमिनेको पासमा ड्यानियल जेम्सले गोल गरेपछि युनाइटेड फराकिलो जिततर्फ अग्रसर बन्यो । ७०औं मिनेटमा ब्रुनो फर्नान्डेसले पेनाल्टीमार्फत गोल गर्दै युनाइटेडलाई खेललाई ६–१ ले अघि बढाए । स्ट्रजिकले मार्सियाललाई पेनाल्टी बक्समा फल गरेपछि युनाइटेडले पेनाल्टी पाएको थियो । जसमा फर्नान्डेस चुकेनन् ।

७३औं मिनेटेमा राफिन्हाको पासमा स्टुआर्ट डालासले गोल गर्दै खेललाई ६–२ को अवस्थामा ल्याए । त्यसपछि थप गोल निस्कन नसक्दा युनाइटेडले फराकिलो जित निकाल्न सफल भयो ।

जितसँगै युनाइटेड १३ खेलबाट २६ अंक जोडेर तेस्रो स्थानमा उक्लिएको छ । एक खेल बढी खेलको शीर्षस्थानको लिभरपुलको ३१ तथा लेस्टर सिटीको २७ अंक छ । पराजित लिड्स १७ अंक जोडेर १४औं स्थानमा छ ।

प्रिमियर लिगकै अर्काे खेलमा एस्टन भिल्लाले १० खेलाडीमा समेटिएको वेस्ट ब्रुमलाई ३–० ले पराजित गरेको छ । एस्ट भिल्लाको जितमा अनवर इएल घाजीले दुई तथा बर्टरान्ड ट्राओरेले एक गोल गरे ।

३६औं मिनेटमा ज्याक लिभरमोर सिधै रातो कार्ड खादै मैदानबाट बाहिरिएपछि घरेलु टोली वेस्ट ब्रुम १० खेलाडीमा समेटिएको थियो । जितसँगै एस्टन भिल्ला २२ अंक जोडेर नवौं स्थानमा उक्लिएको छ । वेस्ट ब्रुम ७ अंक जोडेर १९औं स्थानमा छ ।