एजेन्सी – इंग्लिस क्लब टोटेनहम हस्टपर र म्यानचेस्टर युनाइटेड इंग्लिस फुटबल लिग कप –इएफएल) कपको सेमिफाइनलमा प्रवेश गरेका छन् ।

बुधबार राति भएको क्वाटरफाइनलमा टोटेनहमले स्टोक सिटीलाई तथा म्यानचेस्टर युनाइटेडले एभर्टनमाथि जित निकाल्दै अन्ति चारको यात्रा तय गरेका हुन् । यससँगै इएफएल कपको सेमिफाइन समिकरण पुरा भएको छ ।

मंगलबार राति म्यानचेस्टर सिटी र ब्रेन्टफोर्डले सेमिफाइनलमा स्थान बनाइसकेका थिए । अब सेमिफाइनलमा म्यानचेस्टर युनाइटेड र म्यानचेस्टर सिटी तथा टोटेनहम र ब्रेन्टफोर्डबीच प्रतिस्पर्धा हुनेछ । दुवै खेल ४ जनवरीमा राति १०ः४५ बजे हुनेछ ।

टोटेनहमको जितमा ग्यारेथ बेल, बिन डेभिस र ह्यारी केनले गोल गरे । स्टोकका जोर्डन थोम्पसनले एक गोल फर्काए । स्टोक सिटीको मैदानमा भएको खेलमा २२औं मिनेटमा ह्यारी विङ्सको पासमा ग्यारेथ बेलले गोल गर्दै टोटेनहमलाई अग्रता दिलाएका थिए ।

५३आं मिनेटमा थोम्ससनले बराबरी गोल फर्काए । ७०औं मिनेटमा बिन डेभिसले गोल गर्दै टोटेनहमलाई २–१ ले अघि बढाए । ८१औं मिनेटमा ह्यारी केनले गोल गर्दै टोटनहमको जित पक्का गरे ।

यस्तै अर्काे खेलमा दुई मिनेटको अन्तरमा इडिन्सन काभानी र एन्थोनी मार्सियालले गाल गरेपछि म्यानचेस्टर युनाइटेडले एभर्टनलाई २–० ले पराजित गरेको छ । काभानीले ८८औं मिनेटमा तथा मार्सियालले ९०औ मिनेटमा गोल गरेका थिए ।