एजेन्सी – जर्मन प्रशिक्षक थोमस टुचेल फ्रान्सेली क्लबले आफ्नो बर्खास्तीमा देखाएको व्यवहारलाई लिएर रुष्ट भएका छन् । क्लबले आधिकारिक रुपमा टुचेललाई पदमुक्त गरेको जानकारी नदिएपनि निर्देशक लिओनार्डोले भने केहि सिमित मिडियामा यसको पुष्टि गरिसकेका छन् ।

टुचेलले निर्देशक लिओनार्डोसँग बैठकपछि आफू पदमुक्त भएको जानकारी पाएका थिए । तर उनी र क्लबबीच अझैपनि छाड्ने विषयमा सहमति हुन बाँकी छ । क्लबले उनको सम्झौता अझै बाँकी रहेकाले क्षतिपूर्ति दिनुपर्ने हुन्छ । त्यसबारे निर्णय नहुँदै उनको बर्खास्तीबारे निर्णय बाहिर गएपछि टुचेल रुष्ट भएका हुन् ।

बुधबार टुचेल र लिओनार्डोबीच भएको बैठकमा जर्मन प्रशिक्षकले आफू पदमुक्त भएको जानकारी पाएका थिए । केहि समय अघिदेखि नै टुचेलको बोर्डसँग राम्रो सम्बन्ध रहेको थिएन । तर पछिल्लो समय लिगमा अपेक्षित नतिजा ल्याउन नसकेपछि क्लबले उनलाई बर्खास्त गर्ने निर्णय गरेको हो ।

च्याम्पियन्स लिगमा समूह विजेताको रुपमा अन्तिम १६ मा प्रवेश गरेपनि लिगमा भने पिएसजी संघर्ष गरिरहेको छ । गत साता लियोनसँग पराजित भएको पिएसजी लिलसँग बराबरीमा रोकिएको थियो । शीर्षस्थानमा पकड गुमाएको साविक विजेता टोली दुवै टोलीभन्दा १ अंक पछाडी छ ।

स्रोतका अनुसार क्लबले टुचेललाई ७ मिलियन युरो तिर्नुपर्नेछ । क्लबका लागि २ लिग उपाधि र एक फ्रेन्च कप जिताएका टुचेलले क्लब इतिहासमा नै पहिलो पटक च्याम्पियन्स लिग फाइनल पुर्याएका थिए । उनको स्थानमा मौरिसियो पोचेटिनो आउने लगभग तय रहेको छ । क्लबले टुचेलको कागजी प्रक्रिया सकिएपछि पोचेटिनोको सम्झौता सार्वजनिक गर्नेछ ।