एजेन्सी – इल्केए गुन्डोगान र फेरान टोरेसको गोल मद्दतमा म्यानचेस्टर सिटीले इंग्लिस प्रिमियर लिगमा न्युक्यासल युनाइटेडमाथि २–० को सहज जित निकालेको छ ।

घरेलु मैदान इतिहाद स्टेडियममा सिटीको जितमा गुन्डोगानले पहिलो तथा टोरेसले दोस्रो हाफमा गोल गरेका थिए । खेलको १४औ मिनेटमा रहिम स्टर्लिङको पासमा गुन्डोगानले गोल गर्दै सिटीलाई पहिलो हाफमा १–० को अग्रता दिलाए ।

२०औं मिनेटमा केभिन डि ब्रुयनको प्रहारलाई न्युक्यासलका गोलरक्षक डार्लाेले बचाए । २३औं मिनेटमा रुवेन डियास र स्टोन्स हेडरको लागि एक आपसमा जुध्दा बलले पोस्टको दिशा लिन सकेन ।

लगत्तै फेरान टोरेसको प्रहारलाई डार्लाेले बचाउ गरे । ३५औं मिनेटमा टोरेसको पासमा डि ब्रुयनले सुवर्ण अवसर पाएपनि सदुपयोग गर्न सकेन । ५५औैं मिनेटमा फेरान टोरेसले गोल गर्दै सिटीको अग्रता दोब्बर पारे ।

५९औं मिनेटमा बर्नाडो सिल्भाको प्रहार पोस्टमा लागेर फर्कदा सिटी अग्रता तेब्बर पार्नबाट चुक्यो । त्यसपछि पनि सिटीले न्युक्यासललाई दवावमा राख्दै आक्रमण बुनिरहेपनि थप गोल निस्कन नसक्दा २–० ले विजयी हुन सफल भयो ।

यो जितसँगै सिटी १४ खेलबाट २६ अंक जोडेर पाँचौ स्थानमा उक्लिएको छ । पराजित न्यु क्यासल १८ अंक जोडेर १२औं स्थानमा रहेको छ ।