एजेन्सी – इंग्लिस प्रिमियर लिगमा लिड्स युनाइटेडले वेस्ट ब्रममाथि सानदार जित निकालेको छ । लिड्सले वेस्ट ब्रमलाई उसकै मैदानको ५–० को फराकिलो हार चखाएको हो ।

वेस्ट ब्रमको मैदानमा मंगलबार राति भएको खेलमा लिड्सको जितमा इजजान एलिओस्की, ज्याक ह्यारिसन, रोड्रिगो र राफिन्हाले गोल गर्दा एक गोल उपहार पाएको थियो । पहिलो हाफमा ४ तथा दोस्रो हाफमा एक गोल सम्भव भएको थियो ।

खेलको नवौं मिनेटमा नै रोमाइन सयर्सको आत्मघाती गोलबाट लिड्सले अग्रता लिएको थियो । त्यसपछि खेलमा पकड जमाएको लिड्सले १० मिनेटको अन्तरमा ३ गोल गर्दै खेलमा ४–० को आरामदायी अग्रता लिएको थियो ।

३१औं मिनेटमा इजजान एलिओस्कीले गोल गर्दै लिड्सको अग्रता दोब्बर पारे । ३६औं मिनेटमा प्याट्रिक बामफोर्डको पासमा ज्याक ह्यारिसनले गोल गर्दै लिड्सलाई ३–० ले अघि बढाए । ४०औं मिनेटमा माटेस्ज क्लिचको पासमा रोड्रिगोले गोल गर्दै लिड्सलाई पहिलो हाफमा ४–० को आरामदायी अवस्थामा ल्याए ।

७२औं मिनेटमा राफिन्हाले स्टुआर्ट डालासको पासमा गोल गर्दै लिड्सलाई सानदार जित दिलाए । यो जितले लिड्स १६ खेलबाट २३ अंक जोडेर ११औं स्थानमा उक्लिएको छ । पराजित वेस्ट ब्रम ८ अंक जोडेर रेलिगेसन क्षेत्रको पुछारबाट दोस्रो स्थानमा छ ।