एजेन्सी – माउरिसियो पोचेटिनो पेरिस सेन्ट जर्मेन (पिएसजी) को प्रशिक्षक नियुक्त भएपछि डेले अलि र लिओनल मेस्सी त्यहाँ जान सक्ने अनुमान गरिएको छ । अर्जेन्टिनी प्रशिक्षकले त्यसलाई पूर्ण रुपमा अस्वीकार पनि गरेका छैनन् ।

टोटेनहमका पूर्व प्रशिक्षक समेत रहेको पोचेटिनो मंगलबार पिएसजीको नयाँ प्रशिक्षकका रुपमा सार्वजनिक गरिएको थियो । बुधबार लिग वानमा सेन्ट इटिनीविरुद्धको खेलबाट उनले डेब्यू गर्दैछन् ।
‘हरेक क्लब फरक हुन्छ र त्यसमा तुलाना गर्नु उपयुक्त हुँदैन । अब अहिले टोटेनहमको बारेमा चर्चा गर्नु उपयुक्त हुँदैन । त्यो पहिलाको कुरा हो । तर म अहिले शत प्रतिशत पेरिसमा छु,’ उनले पत्रकार सम्मेलनमा भनेका छन् ।

‘अहिले हामी सम्भावित खेलाडी सरुवाको बारेमा चर्चा गरिरहेका छैनौं । हामी कसरी आउने खेलको तयारी गर्ने भन्नेमा केन्द्रित छौं ।’

त्यति हुँदा हुदै पनि उनले अलि र मेस्सीका विषयमा संकेत गर्दै भने , ‘भविष्यमा हामी यी सबै विषयमा छलफल गर्नेछौं । उत्कृष्ट खेलाडीलाई पिएसजीमा जहिले पनि स्वागत गरिन्छ ।’ नेयमारका लागि क्लबमा उत्कृष्ट पोसिजन कुन हुन सक्छ भन्ने प्रश्नमा पोचेटिनोले सबै खेलाडीका लागि मैदानमा उत्कृष्ट र सके सम्म सहज ठाँउको खोजी गरिने बताए ।

‘जब नेयमार चोटमुक्त भएर फर्कनेछन् । त्यसपछि हामी उनलाई मैदानमा उत्कृष्ट प्रदर्शनका लागि सघाउने छौं,’ उनले थपे, ‘अहिले प्रणालीको सुरुवात हो । हामी सधै लयका विषयमा समूहमा छलफल गर्नेछौं ।’ उनले हरेक खेलाडीको कुरा सुन्ने र प्रणालीको विकास गर्ने योजना सुनाउँदै सबैका लागि सकारात्मक र उपयुक्त ठाँउ दिन प्रयास गर्ने जनाए ।

‘नेता जहिले पनि नेता हुन्छ । प्रस्तुत गर्ने सबैका आ आफ्ना शैली हुन्छन्,’ उनले भने, ‘हामीसँग क्षमतावान खेलाडीको समूह छ । मैदानमा नेतृत्व गर्ने क्षमता राख्छन् । सबै वातावरणमा उपयुक्त हुनका लागि हामी प्रयास गर्नेछौं ।’

केलियन एमबाप्पलेको तारिफ गरेको पोचेटिनोले फ्रान्सेली अन्तर्राष्ट्रियलाई आफ्नो क्षमता अनुसार खेल्नका लागि वातावरण तयार पारिने स्पष्ट पारे । ‘उत्कृष्ट खेलाडीका साथ हामीसँग अदभुत टोली छ । यो कुनै नयाँ विषय पनि होइन,’ उनले भने ।

‘एमबाप्पे जस्ता उत्कृष्ट खेलाडी धेरै विकल्पमा प्रयोग हुन सक्छन् । सबैभन्दा महत्त्वपूर्ण उनी कसरी मैदानमा आक्रमण गर्छन् भन्ने हो । हामी उनको क्षमतालाई थप उजागर गर्नका लागि सबैभन्दा उत्तम ठाँउको खोजि गर्नेछौं ।’