एजेन्सी – कारावाओ कप अर्थात इंग्लिस फुटबल लिग (इएफएल) कपको दोस्रो सेमिफाइनलमा आज म्यानचेस्टर ‘डर्वी’ मा म्यानचेस्ट युनाइटेड र सिटीबीच प्रतिस्पर्धा हुँदैछ ।

खेल ओल्डट्राफोर्डमा नेपाली समय अनुसार राति १ः३० बजे सुरु हुनेछ । दुबै टिम जित निकाल्दै फाइनल पुग्ने लक्ष्यसहित मैदान उत्रनेछ ।

यस खेलको विजेताले फाइनलमा टोटेनहमसँग २५ अप्रिलमा प्रतिस्पर्धा गर्नेछ । टोटेनहमले च्याम्पियनसिप क्लब ब्रेन्टफोर्डलाई २–० ले पराजित गर्दै फाइनलमा स्थान बनाइसकेका छन् । घरेलु मैदानमा युनाइटेड सिटीलाई हराउदै फाइनल पुग्ने दाउमा हुनेछ ।

युनाइटेडसँग मार्कुस रासफोर्ड, एन्थोनी मार्सियल, पल पोग्वा, ब्रुनो फर्नान्डेस, आरोन वान बिशाखा, ह्यारी मिगुएर, लुका सा, स्कट म्याकटोमिने र गोलरक्षक डेभिड हे गेया टोलीमा रहेका छन् । प्रतिबन्धका कारण इडिन्सन काभानी टोलीमा हुनेछैनन् । काभानीले ३ खेलको प्रतिबन्ध खेपिरहेका छन्।

यता, सिटी पनि युनाइटेडलाई उसकै मैदानमा स्तबध पार्दै फाइनल पुग्ने दाउमा हुनेछ । कोरोनामुक्त भएका ग्राबियल जिसस र केली वाल्करले युनाईटेडविरुद्ध खेल्ने सम्भावना छ ।
टोलीसँग केभिन डि ब्रुयन, फिल फोडेन, इल्केए गुन्डोगा, बर्नाडो सिल्भा, रहिम स्टर्लिङ, रोड्री, रुवेन डियास, जोन स्टोन्स, गोलरक्षक ज्याक स्टेफेन टोलीमा रहेका छन् ।

चोटका कारण पहिलो रोजाईका गोलरक्षक इडर्सन मोराएसले खेल्ने सम्भावना न्युन रहेको छ । युनाइटेड र सिटीले गत सिजन पनि सेमिफाइनलमा भिडेका थिए । जसमा सिटीले समग्रमा ३–२ को जित निकालेको थियो ।