काठमाडौं (हाम्रो खेलकुद)– धनकुटा राजारीको रारा फुटबल क्लब मोरङको बेलबारीमा जारी टुबोर्ग संजोग स्मृति नकआउट फुटबल प्रतियोगिताको फाइनलमा पुगेको छ ।

मोरङको बिन्दाबासिनी फुटबल क्लबलाई टाइब्रेकरमा ४–३ ले हराउँदै रारा उपाधि नजिक पुगेको हो । निर्धारित ८० मिनेटको खेल १–१ को बराबरीमा टुंगिएपछि टाइब्रेकरमा रारा विजयी भएको हो ।

टाइब्रेकरमा राराका लागि योगेश गुरुङ, बुद्ध चेम्जोङ , सुनिल खड्का र रुपेश केसीले गोल गरे । प्रवेश दनुवारको पेनाल्टी गोलमा परिणत हुन सकेन । बिन्दाबासिनीका लागि अनिल धामी, पदम भट्टराई र मिलन राईले गोल गरे । अजित चौधरी कैलाश बस्नेतको पेनाल्टी भने सफल भएन ।

त्यसअघि छैटौं मिनेटमा प्रवेशको आत्मघाती गोलबाट बिन्दाबासिनीले खेलमा अग्रता लिएको थियो । तर, २५ औं मिनेटमा राराका बुद्धले गोल गर्दै खेललाई बराबरीमा पुर्याएका थिए । बुद्ध नै खेलको म्यान अफ दी म्याच घोषित भए । पूर्व राष्ट्रिय खेलाडी समेत रहेका विराट गोल्ड कप ट्रष्टका सचिव मनोज बस्नेतले बुद्धलाई मेडलसहित २ हजार ५ सय ५५ रुपैयाँ हस्तान्तरण गरे ।

खेलमा राराका प्रकाश भुजेल र उमेश कार्कील तथा बिन्दाबासिनीको नितिन थापा मगर र पूर्ण चेम्जोङले पहेलो कार्डको सामना गरेका थिए । प्रतियोगिताको दोस्रो सेमिफाइनलमा बिहीबार सताक्षीधाम स्पोटिड्ग क्लब। झिलझिले धरान सिटी एकेडमी फुटबल क्लबबीच प्रतिस्पर्धा हुनेछ ।

बेलबारी फुटबल क्लबले आयोजना गरेको प्रतियोगितालाई बेलबारी नगरापालिकाले संयोजन गरेको छ । टुबोर्ग मुख्य प्रायोजन रहेको प्रतियोगितामा सन्ध्या सारा युपिभिसी प्रोफाइल प्रालि प्रायोजक तथा मोरङ कन्ट्रसन प्रालि, सयपत्री मल्टी पर्पोज प्रालि र आदर्श बहुउद्देश्य कृषि फर्म सह प्रयोजक रहेका छन् । प्रतियोगितामा १० टोलीको सहभागिता रहेको छ ।