एजेन्सी – इटालियन सिरी ए अन्तर्गत बुधबार राती साविक विजेता युभेन्टसले अपराजित रहँदै लिगको शीर्षस्थानमा रहेको एसी मिलानलाई लिगको पहिलो हार चखाएको छ ।

स्टार फरवार्ड ज्लाटान इब्राहिमोभिच चोटका कारण बाहिर रहेको खेलमा युभेन्टसले जित दर्ता गरेको हो । युभेन्टसको जितमा फेडेरिको किएजाले दुई गोल गर्दा अर्को गोल वैकल्पिक खेलाडी वेस्टन मकेनीको नाममा रहयो । मिलानका डेविड कालाब्रियाले बराबरी गोल गरेपनि अंक जोड्न भने पर्याप्त रहेन ।

खेलको १८ औं मिनेटमा किएजाले युभेन्टसलाई अग्रता दिलाएका थिए । उनले पाउलो डिबालासँग वन-टु पास खेल्दै बनाएको मुभमा गोल गरेका थिए । त्यसको केहि मिनेट अघि पनि उनले गरेको प्रहार क्रसबारमा लागेर फर्किएको थियो ।

पहिलो हाफको ४ मिनेट समय बाँकी रहँदा मिलान खेलमा फर्कियो । मिडफिल्डमा एड्रीएन राबीओटले बल गुमाएपछि सुरु भएको मिलानको आक्रमणलाई कालाब्रियाले गोलमा परिणत गरेका थिए । उनले राफाएल लिआओको पासमा गरेको प्रहार गोलरक्षक वोजचिएक सेचेज्नीले बचाउने कुनै अवसर पाएनन् ।

दोस्रो हाफको ६२ औं मिनेटमा किएजाले नै युभेन्टसको अग्रता पुन: स्थापना गरे । उनले पेनाल्टी क्षेत्रको ठिक बाहिरबाट गरेको प्रहार गोलमा परिणत भएको थियो । त्यसको १५ मिनेटपछि नै दुई वैकल्पिक खेलाडीको प्रयासमा युभेन्टस २ गोलले अघि बढ्यो । डेजान कुलुसेभ्सकीको पासमा मकेनीले गोल गर्दै जिततर्फ उन्मुख गराए ।

यस नतिजासँगै एसी मिलानले लिगमा पहिलो हार तथा समग्र सिजनमा दोस्रो हार बेहोरेको छ । हारका बाबजुद टोली लगको शीर्षस्थानमा कायम नै छ । मिलानको १६ खेलमा ३७ अंक तथा सहरी प्रतिद्वन्द्वी इन्टरको १६ खेलमा ३६ अंक छ । रोमा १६ खेलमा ३३ अंकसहित तेस्रो तथा युभेन्टस १५ खेलमा ३० अंकसहित चौथो स्थानमा छ ।