एजेन्सी – रियल म्याड्रिडका प्रशिक्षक जिनेदिन जिदान घरमै सेल्फ आइसोलेसनमा बसेका छन् । उनीसँग निकटमा रहेका एक जनालाई कोभिड १९ संक्रमण पुष्टी भएपछि जिदान आइसोलेसनमा बसेका हुन् ।

जिदान टोलीको बुधबार भाल्डेबेबासमा भएको अभ्यासमा अनुपस्थित रहे । जिदानकै पिसिआर परिक्षण भने नेगेटिभ आएको थियो । स्पेनिस सरकार, स्थानिय निकाय र ला लिगाको कोभिड १९ का लागि जारी गरेको मापदण्ड अनुसार जिदान आइसोलेसनमा बसेका हुन् ।

अब उनले २ साता आइसोलेसनमा बिताउनुपर्नेछ । उनको पिसिआर परिक्षण नेगेटिभ आएकोले आइसोलेसनको अवधि १० दिन पनि हुन सक्ने बताइएको छ । अब जिदानले ओसासुनाविरुद्ध शनिबार हुने खेल गुमाउनेछन् । त्यस्तै बिहीबार एथलेटिक क्लबविरुद्ध सुपर कोपा डि स्पानाको सेमिफाइनल गुमाउनेछन् ।

यदि त्यो सेमिफाइनल जितेको खण्ड र १० दिनपछि पिसिआरको अर्को परिक्षण नेगेटिभ आएको खण्डमा सुपर कपको फाइनलमा भने जिदान उपलब्ध हुने बताइएको छ । स्थानीय निकाय र ला लिगाले नेगेटिभ रिपोर्ट आएपनि संक्रमितसँग सम्पर्कमा आएपछि १० दिन भने आइसोलेसनमा बस्नै पर्ने नियम राखेका छन् ।

१७ खेलमा ३६ अंकका साथ रियल ला लिगा अंक तालिकाको दोस्रो स्थानमा छ । २ खेल कम खेलेको शीर्षस्थानको एट्लेटिको म्याड्रिडको ३८ अंक छ । १७ खेलमा ३१ अंक जोड्दै बार्सिलोना तेस्रो स्थानमा छ ।