एजेन्सी – फ्रान्सेली सुपर कपको उपाधिका लागि आजर राति पेरिस सेन्ट जर्मेन (पीएसजी) र मार्सेबीच प्रतिस्पर्धा हुदैछ । खेल राति १ः४५ बजे बोल्लाअर्ट मैदान लेन्समा हुनेछ ।

सुपर कपको सर्वाधिक सफल पीएसजी मार्सेलाई हराउदै १०औं पटक उपाधि जित्ने दाउमा हुनेछ ।
पीएसजी २०१३ देखि सुपर कपको लगातार च्याम्पियन टोली हो । त्यसअघि पीएसजीले १९९५ र १९९८ मा उपाधि जितेको थियो ।

मार्सेविरुद्धको खेलमा पीएसजीबाट नेयमारले चोटबाट पूनरागमन गर्न सक्नेछ । इंकल इन्ज्युरीका कारण झन्डै एक महिनादेखि मैदान बाहिर रहेको नेयमार सोमबारदेखि टोलीको प्रशिक्षणमा सामेल भएका छन् । यस्तै टोलीसँग केलियन एमबाप्पे, एन्जल डि मारिया, मोइस किन, मार्काे भेराट्टी, ड्यानियल पारेडेस, प्रेसनेल किमपेम्वे, लेभिन कुर्जाभा, मार्किन्हस र केलर नाभास टोलीमा हुनेछन् ।

मार्से पनि पीएसजीलाई स्तब्ध पार्दै चौथोपटक सुपर कोपा जित्ने लक्ष्यमा हुनेछ । मार्से २०११ मा च्याम्पियन बनेयता उपाधि जित्न सकेको छैन । टोलीसँग डारियो बेनेडेट्टो, डिमिट्रि पायट, फ्लोरियल थाउभिन, अल्भारो गोन्जालेज, हिरोकी साकाई, युटो नागाटोमो र गोलरक्षक स्टिभ मानडान्डाको साथ रहेको छ ।

यि दुई टोलीबीचको पछिल्लो २५ खेलको नतिजामा पीएसजी हावी छ । पीएसजीले १८ खेल आफ्नो पक्षमा पार्दा मार्से ३ खेलमा विजयी भएको छ । ४ खेल बराबरीमा सकिएको छ । सेप्टेम्बरमा भएको लिग वानको खेलमा पीएसजी मार्सेसँग १–० ले स्तब्ध भएको थियो ।

उक्त खेलमा रंगभेदको आरोप र दुई टोलीका खेलाडीबीच हात हालाहाल हुँदा माहोल निकै खराब भएको थियो । पीएसजी उक्त हारको बदाल लिने लक्ष्यमा रहँदा मार्से सोही जित निकाल्दै च्याम्पियन बन्ने दाउमा हुनेछ ।