एजेन्सी – भेट्रान फरवार्ड ज्लाटन इभ्राहिमोभिचको दुई गोल सहयोगमा शीर्षस्थानमा रहेको एसी मिलानले इटालियन सिरी ‘ए’ मा क्याग्लिएरीमाथि २–० को सहज जित निकालेको छ ।

सोमबार राति भएको खेलमा मिलानले क्याग्लिएरीमाथि उसकै मैदानमा सहज जित हात पार्दा ज्लाटनले पहिलो र दोस्रो हाफमा समान एक गोल गरे ।

क्याग्लिएरीमा मिलानले खेलको सातौ मिनेटमा ज्लाटनको पेनाल्टी गोलबाट अग्रता लिएको थियो । पेनाल्टी बक्समा ब्राहिम डियाजमाथि ल्याकोजियानिसले फल गरेपछि प्राप्त पेनाल्टीम ज्लाटन चुकेनन् ।

३६औं मिनेटमा डाभिड कालाब्रियाको प्रहार पोस्टमा लागेर फर्कदा मिलान अग्रता दोब्बर पार्नबाट चुक्यो । ३८औं मिनेटमा घरेलु टोली बराबरीबाट चुक्यो । मारिनको पासमा जोओ पेड्रोको प्रहार पोस्ट नजिकैबाट बाहिरियो ।

५२औं मिनेटमा ज्लाटनले व्यक्तिगत दोस्रो गोल गर्दै मिलानलाई २–० ले अघि बढाए । डाभिड कालाब्रियाको पासमा ज्लाटनले उत्कृष्ट फिनिस गरेका थिए । ६३औं मिनेटमा पेड्रोको पासमा जियोभानी सिमिओनले वान भर्सेस वानको स्थितिमा गोल गर्न नसक्दा क्याग्लिएरीले गोलअन्तर घटाउन सकेन ।

लगत्तै काउन्टर अट्याकमा क्याग्लिएरीका गोलरक्षक क्राग्नोले ज्लाटनको प्रहारलाई बचाएपछि ह्याट्रिकबाट चुके । ७४औं मिनेटमा मिलान १० खेलाडीमा समेटियो । ६६औं मिनेटमा जेन्स पिटस हगको स्थानमा मैदान छिरेका एलेक्सिस साइलेमेकर्स दोहोरो पहेलो कार्ड खादै मैदानबाट बाहिरिए ।

तर त्यसको फाइदा क्याग्लिएरीले उठाउन सकेन । सब्सिच्युट रिकार्डाे सोटटिलले दुई सुवर्ण अवसर पाएपनि सदुपयोग हुन नसक्दा क्याग्लिएरी घरेलु मैदानमा पराजित हुन पुग्यो ।

यो जितसँगै मिलानले शीर्षस्थानमा स्पष्ट ३ अंकको अग्रता लिएको छ । मिलानको १८ खेलबाट ४३ अंक पुगेको छ । समान खेलबाटै दोस्रो स्थानमा रहेको इन्टर मिलानको ४० अंक छ । पराजित क्याग्लिएरी १४ अंकसहित १७औं स्थानमा छ ।