एजेन्सी – क्याटलान क्लब बार्सिलोना कप्तान लिओनल मेस्सी बिना नै बिहीबार राती कोपा डेल रेको खेलमा उत्रँदैछ । प्रशिक्षक रोनाल्ड कोम्यानले टोलीमा थुप्रै नयाँ खेलाडीलाई समेटेका छन् ।

बी डिभिजन टोली सेगुन्डाविरुद्ध हुने खेलका लागि कोम्यानले इलेक्स मोरिबा, कोराड डि ला फुन्टे र एलेक्स कोलाडो पहिलो रोजाइमा खेल्ने सम्भावना छ । कोपा डेल रेमा युवा टोलीका ६ जना खेलाडीसम्म प्रयोग गर्न पाइन्छ । तर, एक पटकमा भने ४ जनालाई मात्र उतार्न पाउने प्रावधान छ ।

चोटका कारण आन्सु फाती, सर्जियो डेस्ट, फिलिप्पे काउटिनो, जेरार्ड पिके र सर्जी रोबेर्टो टोलीमा छैनन् । त्यस्तै मेस्सी प्रतिबन्धमा रहँदा जोर्डी अल्बा र फ्रेन्की डि जोङ लाई कोम्यानले विश्राम दिएका छन् । एथ्लेटिक बिल्बाओविरुद्धको स्पेनिस सुपर कप फाइनलमा विपक्षी खेलाडीलाई अनुहारमा हानेपछि मेस्सीलाई रेफ्रीले सिधै रातो कार्ड देखाएका थिए ।

अघिल्लो दिन रियल म्याड्रिड बी डिभिजन टोलीसँग पराजित हुँदै कोपा डेल रेबाट बाहिरिएको थियो । त्यस्तै एटलेटिको म्याड्रिड पनि अघिल्लो चरणमा तल्लो श्रेणीको टोलीसँग पराजित भएको थियो ।

कोपा डेल रेका लागि बार्सिलोना टोली :

मार्क आन्द्रे टेर स्टेन, रोनाल्ड अराउजो, सर्जियो बुस्केट्स, एन्टोइन ग्रिजमन, मिरालिम प्यानिच, मार्टिन ब्रेथवेट, ओसमाने डेम्बेले, रिकी पुज, नाटो, क्लिमेन्ट लेनग्लेट, पेड्री, ट्रिनकाओ, म्याथुज फर्नान्डेज, सामुइल उम्टिटी, जुनियर फिर्पो, इलेक्स मोरिबा, ओस्कार मिन्गुइजा, कोनराड डि ला फुन्टे, एलेक्स कोलाडो र आर्नुन टेनस