एजेन्सी – इंग्लिस प्रिमियर लिगमा एभर्टन र लेस्टर सिटी बराबरीमा खेल्दा लन्डन क्लब चेल्सी र पनि बराबरीमा रोकिएको छ ।

चेल्सी वल्भ्ससँग तथा लेस्टर सिटी एभर्टनसँग बराबरीमा रोकिएको हो । खेलमा एभर्टन र लेस्टर सिटीले १–१ गोलको बराबरी खेल्दै अंक बाँडेका छन् । घरेलु मैद्यानमा एभर्टनले अग्रता जोगाउन नसक्दा लेस्टरसँग अंक बाड्नुपरेको हो ।

एभर्टनका हामेस रोड्रिग्वेजले गोल गर्दा लेस्टरका युरी टिलेमान्सले बराबरी गोल फर्काएका थिए । यो बराबरीसँगै लेस्टर २० खेलबाट ३९ अंक जोडेर तेस्रो स्थानमा यथावत रहँदा एभर्टन १८ खेलबाट ३३ अंक जोडेर सातौ स्थानमा रहेको छ ।

घरेलु मैदान स्टामफोर्ड ब्रिजमा नयाँ प्रशिक्षक थोमस टुचेलको पहिलो खेलमा चेल्सीले वल्भ्ससँग गोलरहित बराबरी खेल्दै अंक बाँडे । खेलको पाँचौ मिनेटमा नै ओलिभर जिरुउडको प्रहारले पोस्टको दिशा लिन सकेन ।

३९औं मिनेटमा हाकिम जियाचको फ्रिकिकमा एन्टेनियो रुडिगरको प्रहारलाई वल्भ्सका गोलरक्षक रुइ प्याट्रिसियोले बचाउदा चेल्सी अग्रता लिनबाट चुक्यो । ६१औं मिनेटमा माटियो कोभासिसको पासमा काई हाभर्टजले कट ब्याक दिएको पासमा बेन चिलवेलको वान टच प्रहार क्रसबारमा लाग्दै बाहिरियो ।

७१औं मिनेटमा चेल्सीका गोलरक्षक इडुआर्ड मेन्डीको गलत पासमा पेड्रो नेटो र ड्यानियल पोडेन्सको समन्वयमा बनेको मुभमा वान भर्सेस वानकै अवस्थामा नेटोको प्रहार क्रसबारमा लाग्दा वल्भ्स अग्रता लिनबाट चुक्यो ।

८६औं मिनेटमा कलुम हड्सन ओडोइको प्रहारलाई गोलरक्षक प्याट्रिसियोले मुस्किले विफल पार्दै संकट टारे । इन्ज्युरी समयको थप गरिएको तेस्रो मिनेटमा क्रिस्टियन पुलिसिसको क्रस मासन माउन्टलाई डिफ्लेक्ट अुदै आएको बललाई काई हाभर्टजको हेडर प्रयास विलियन जोसले ब्लक गर्दै चेल्सीलाई निराश पारे ।

यो बराबरीसँगै चेल्सी २० खेलबाट ३० अंक जोडेर आठौं स्थानमा रहेको छ । वल्भ्स २३ अंक जोडेर १३औं स्थानमा रहेको छ ।