एजेन्सी – होफेनहाइनमाथि ४–१ को फराकिलो जित निकाल्दै बायर्न म्युनिखले जर्मन बुन्डेसलिगामा शीर्षस्थानमा ७ अंकको फराकिलो अग्रता कायम गरेको छ ।

शनिबार राति घरेलु मैदानमा भएको खेलमा बायर्नले होफेनहाइनमाथि फराकिलो जित दर्ता गर्दा जेरोमी बोएटिङ, थोमस मुलर, रोबर्ट लेवान्डोस्की र सर्ज जिनाब्रीले गोल गरे । होफेनहाइनका एन्डरेज क्रामारिकले गरेको गोल सान्त्वना बन्यो ।

एलिएन्ज एरिनामा बायर्नले ३२औं मिनेटमा जेरोमी बोएटिङको गोलबाट अग्रता लिएको थियो । ४३औं मिनेटमा मुलरले गोल गर्दै बायर्नको अग्रता दोब्बर पारे । ४४औं मिनेटमा एन्डरेज क्रामारिकले गोल गर्दै खेललाई २–१ को अवस्थामा ल्याए ।

५७औं मिनेटमा लेवान्डोस्कीले गोल गर्दै बायर्नलाई सहज जिततर्फ अघि बढाए । ६३औं मिनेटमा सर्ज जिनाब्रीले गोल गर्दै बायर्नलाई ४–१ को फराकिलो जित दिलाए । ७१औं मिनेटमा बेन्जामिन पाभार्डले गोल गरेपनि भिएआरबाट बान्यता पाएन ।

यो जितसँगै शीर्षस्थानमा रहेको बायर्नको १९ खेलबाट ४५ अंक पुगेको छ । बायर्नले दोस्रो स्थानमा रहेको आरबी लाइप्जिगलाई ७ अंकले पछि पारेको छ । लाइप्जिगको ३८ अंक छ । पराजित होफेनहाइन २२ अंक जोडेर १२औं स्थानमा छ ।

बुन्डेसलिगाकै अर्काे खेलमा बोरुसिया डर्टमुन्डले अग्सवर्गलाई ३–१ ले पराजित गरेको छ । डर्टमुन्डको जितमा थोमस डिलाने र जाडोन सान्चोले गोल गर्दा एक गोल उपहार पाएको थियो । एन्ड्रे हमले गरेको गोल सान्त्वना बन्यो । एर्लिङ ब्राउट हालान्डले पेनाल्टी चुकाएका थिए ।

यो जितसँगै डर्टमुन्ड ३२ अंक जोडेर पाँचौ स्थानमा उक्लिएको छ । पराजित अग्सवर्ग २२ अंक जोडेर १३औं स्थानमा छ ।