एजेन्सी – अतिरिक्त समयमा दोस्रो श्रेणीको पाडेरवर्नमाथि ३–२ को जित निकाल्दै बोरुसिया डर्टमुन्ड जर्मन कप (डिइफबी पोकल) को क्वाटरफाइनलमा प्रवेश गरेको छ ।

घरेलु मैदानमा डर्टमुन्डको जितमा इम्री क्यान, जाडोन सान्चो र एर्लिङ ब्राउट हालान्डले गोल गरे । पाडेरवर्नका जुलियन जस्टभान र प्रिन्स ओसिइ ओवुसुले गोल गरे । डर्टमुन्डले दुई गोलको अग्रता जोगाउन नसक्दा खेल अतिरिक्त समयमा लम्बिएको थियो ।

सिग्नल इडुना पार्कमा मंगलबार राति भएको खलेमा घरेलु टोली डर्टमुन्डले खेलको छैटौं मिनेटमा नै इम्री क्यानको गोलबाट अग्रता लिएको थियो । उनले थोमस डिलानेको पासलाई सदुपयोग गरेका थिए । १६औं मिनेटमा एर्लिङ ब्राउट हालान्डको पासमा सान्चोले गोल गर्दै डर्टमुन्डको अग्रता दोब्बर पारे ।

तर, डर्टमुन्डले दोस्रो हाफमा दुई गोलको अग्रता जोगाउन सकेन । ७९औं मिनेटमा जुलियन जस्टभानले गोल गर्दै खेललाई २–१ को अवस्थामा ल्याउदै पाडेरवर्नलाई खेलमा फर्कने संकेत दिए ।

इन्ज्युरी समयको थप गरिएको चौथो मिनेटमा हालान्डले गोल गरेपनि भिएआरबाट मान्यता पाएन । इन्ज्युरी समयको थप गरिएको सातौ मिनेटमा प्रिन्स ओसिइले पेनाल्टीमार्फत गोल गर्दै खेललाई २–२ गोलको अवस्थामा ल्याएर अतिरिक्त समयमा लम्ब्याए ।

९५औं मिनेटमा हालान्डले गोल गर्दै डर्टमुन्डलाई ३–२ को अग्रता दिलाए । उनले थोमस डिलानेको पासमा गोल गरेका थिए । त्यसपछि थप गोल निस्कन नसक्दा डर्टमुन्ड विजयी हुदै अन्तिम आठको यात्रा तय गर्न सफल भयो ।

अन्य नतिजा
होल्सटाइन किइलविरुद्ध डम्सटार्ड (१–१) पेनाल्टी (७–६), आरडब्लु इसेनविरुद्ध बायर लिभरकुसन (२–१) अतिरिक्त समय, वेर्डर ब्रेमेनविरुद्ध ग्रेदर फुर्थ (२–०)